Қўшимча функционаллар
-
Тунги кўриниш
«Дождь»: Беларусда украиналик болалар ғойиб бўляпти
Россия томонидан ишғол қилинган ҳудудлардан Беларусга дам олиш учун олиб кетилган украиналик болаларнинг бир қисми Россияда йўқоляпти. Ҳуқуқ ҳимоячилари аллақачон 16 нафар украиналик етим боланинг шахсини аниқлаган, деб хабар берди «Дождь» телеканали.
Фото: flot2017
Украинанинг Россия томонидан аннексия қилинган ҳудудларидан болалар Беларусдаги соғломлаштириш лагерларига «таътилга» жўнатиляпти, бироқ ҳаммаси ҳам ортга қайтмаяпти, баъзилари Россия ҳудудида ғойиб бўляпти, дея хабар берди мухолифатдаги Инқирозга қарши халқ бошқаруви раҳбари ва Беларуснинг ўтиш даври қўшма вазирлар маҳкамаси вакили Павел Латушко 19 июль, чоршанба куни «Дождь» телеканалига берган интервьюсида.
«Охирги маълумотлар Украинанинг эгаллаб олинган ҳудудига қайтмаган етим болаларга тегишли. Улар ғойиб бўлган, яъни Россия ҳудудида изи йўқолган. Уларнинг ҳозир қаерда экани ҳақида бошқа маълумот бера олмаймиз», - дейди Латушко. У қанча украиналик болалар шу тарзда ғойиб бўлган бўлиши мумкинлигига аниқлик киритмади.
Мухолифатдаги сиёсатчига кўра, ҳуқуқ ҳимоячилари Беларусга олиб кетилган украиналик болаларни юзларидан аниқлаяпти. Бугунги кунга қадар улар 16 нафар етим боланинг шахсини аниқлади. «Аммо бу фақат бошланиши. Афсуски, уларнинг сони икки юзга яқин бўлиши мумкинлигини айтишимиз мумкин», - деди Латушко.
Аннексия қилинган ҳудудларнинг Россия томонидан тайинланган «ҳокимиятлари» меҳрибонлик уйларидаги етим болалар реабилитация қилиш учун Беларусга олиб кетилаётганини даъво қилмоқда. Июнь ойида Россия ва Беларус иттифоқ давлати котиби Дмитрий Мезенцев қўшиб олинган «ДХР» ва «ЛХР»дан 2000дан ортиқ болалар ота-оналари ёки васийларининг розилиги билан Минск вилоятидаги санаторийга дам олишга кетганини айтди.
18 июль куни Европарламент депутатлари Беларус раҳбари Александр Лукашенкони ҳибсга олишга ордер бериш талаби билан Ҳаагадаги Халқаро жиноий судга (ХЖС) мурожаат қилди. Европарламентнинг халқаро ишлар бўйича қўмитаси томонидан қабул қилинган ҳужжатда Украинага етказилган зарар ва унинг ҳудудида содир этилган жиноятлар учун Беларус масъул экани айтилади. Бундан ташқари, Европарламент депутатлари украиналик болаларни ноқонуний депортация қилишда Лукашенко режимининг ролига ишора қилган.
17 март куни Халқаро жиноий суд Россия президенти Владимир Путинни ҳибсга олишга ордер берди. У ҳудудларидан болаларни Россияга ноқонуний депортация қилишда гумонланган. Худди шундай ордер Россиянинг болалар ҳуқуқлари бўйича ваколатли вакили Мария Лвова-Беловага нисбатан ҳам чиқарилган.
