ЙТҲ рўй берган пайтда кенглиги 28 метр бўлган кўчада “Матиз”дан бошқа автоулов бўлмаган. Марҳум қизча йўлни светофорсиз пиёдалар йўлагидан кесиб ўтаётганда автоҳалокатга учраган.
Эндигина 3-синфни битираётган Эъзоза йўл-ҳаракати қоидасини бузмаган ҳолда пиёдалар учун белгиланган махсус йўлакдан йўлни кесиб ўтаётганда уни машина уриб юборади. Тошкент шаҳар ИИББ ЙҲХБ ахборот хизматининг маълум қилишича, ҳодиса шу йилнинг май ойида пойтахтнинг Учтепа тумани Лутфий кўчасида содир бўлган.
“Матиз” русумли автоулов ҳайдовчиси ЙТҲ сабабини тартибга солинмаган пиёдалар ўтиш йўлагидан ўтаётган пиёдани кўрмай қолгани билан изоҳлаган. Ҳодиса кузатув камераларига тушиб қолган. Тасвирларда “Матиз” пиёдалар учун белгиланган йўлакчадан кенглиги 28 метр бўлган кўчанинг ярмигача бориб улгурган қизчани катта тезликда келиб уриб юборгани акс этган.
Бироқ ҳайдовчи ЙПХ ходимлари билан суҳбатда 8 яшар қизчани уриб юборган пайтда соатига 60 километрдан сал юқорироқ тезликда ҳаракатланиб келганини айтиб, айбни зиммасидан соқит қилишга уринади.
“Йўлнинг нариги томонидан югуриб ўтиб қолди. Тўхташга улгурмадим, тормозни босганимни биламан, бориб урдим. Қизча зарб кучидан учиб кетди”, дейди қоидабузар ҳайдовчи.
Энг қизиғи, ҳодиса содир бўлган вақтда йўлнинг қатнов қисмида “Матиз”дан бошқа автоулов бўлмаган. Яъни ҳайдовчининг таъбири билан айтганда, унинг пиёдани кўрмай қолишига сабаб бўладиган ҳеч бир омил мавжуд бўлмаган.
“Кичкина одамни эмас, катта одамни уриб юборгандай пачақ бўлган-ку машина. Саккиз ёшли бола, у мурғаккина гўдак бўлади-ку ҳали. Тез юришнинг оқибатида бўлади бунақа ҳалокатлар. Белгиланган жой бўлса, йўл белгилари кўриниб турган бўлса, пиёдалар ўтиш жойи бўлса, қандай кўрмай қолиш мумкин?” дейди одам ўлимига сабаб бўлган ҳайдовчига куйинчалик билан ЙПХ инспектори.
Пиёдалар ўтиш жойида махсус йўл чизиқлари ва тегишли йўл белгиси мавжуд бўлган жойда ҳайдовчи биргина “кўрмай қолдим” дея вазиятдан қутулиб кета олмайди. Чунки Йўл ҳаракат қоидаларига мувофиқ ҳайдовчи пиёдалар йўлакчасини англатувчи йўл белгиси ёки йўл чизиқлари бор жойларда пиёда бор ёки йўқлигидан қатъи назар тезликни пасайтириши ёки тўхташи шарт.
“Матиз”нинг “лобовой”ига боши билан урилган. Бу бола 78-мактабда 3-синфда ўқирди. Пиёдалар йўлагининг олдида махсус йўл белгиси ўрнатилган. Лекин ҳайдовчилар бу белгига эътибор ҳам қилишмайди. Одам ўтяпти, мактаб болалари ўтяпти, деб секинроқ юришмайдиям. Ҳар битта инсон ўша қизчанинг онасининг ўрнига ўзини қўйиб кўрсин”, дейди марҳумнинг қўшниси.
Қизча ҳодиса рўй берган жойга энг яқин хусусий клиникага олиб борилган. Бошидан олган жиддий жароҳати оқибатида шифокорлар томонидан кўрсатилган ёрдамга қарамай тахминан 3 дақиқадан сўнг унинг жони узилган.
UzReport телеканали Тошкент шаҳар ИИББ ЙҲХБ билан ҳамкорликда тайёрланган хотира-кўрсатувида қоидабузар ҳайдовчига қандай чора кўрилгани очиқланмаган.
