Жорий йилнинг 1-5 сентябрь кунлари Берлин шаҳрида бўлиб ўтган IFA 2023 кўргазмаси доирасида HONOR бренди ўзининг янги смартфони – HONOR Magic V2’нинг глобал тақдимотини ўтказди. Kun.uz мухбири дунёдаги энг ингичка ва енгил букланувчи смартфон сифатида тан олинган мазкур қурилманинг дизайни, техник имкониятлари ва бошқа телефон моделларидан ажралиб турадиган жиҳатлари ҳақида ҳикоя қилади.
Юпқа ва симметрик дизайн
HONOR смартфонлари ҳар доим нафис дизайн ва илғор технологияларнинг мукаммал уйғунлиги билан ажралиб туради. Ушбу жиҳатлар Magic V2'да ҳам жамланган. Хусусан, Magic V2 ёпиқ ҳолатда 9,9 мм, очилганда эса 4,7 мм қалинликда бўлади. Таққослаш учун, Samsung Galaxy Z Fold5’нинг қалинлиги мос равишда 6,1 ва 13,4 мм'ни ташкил этади.
HONOR Magic V2’нинг оғирлиги эса атиги 231 грамм. Бу iPhone 14 Pro Max (240 грамм) ва Galaxy Z Fold5(262 грамм)дан сезиларли даражада енгил. Шу жиҳатдан, смартфон кичик сумкача ва чўнтагингизга ҳам осонгина жойлашади.
Катта ва силлиқ экран ёрдамида сиз кино томоша қилишингиз, жадваллар ва матнлар билан ишлашингиз, экраннинг пастки қисмини клавиатура сифатида ишлатишингиз, фотосуратлар чизишингиз ва уни таҳрирлашингиз ҳам мумкин.
Техник имкониятлари
HONOR Magic V2 смартфони 6,43 дюймли (2376×1060 пикселгача тасвирни кўтаради) ташқи дисплейга ва 7,92 дюймли(2156×2344 пикселгача тасвирни кўтаради) ички OLED экранига эга. Уларнинг янгиланиш частотаси 120 Гц ва HDR10+ стандартини қўллаб-қувватлайди. Қурилма Qualcomm компаниясининг Snapdragon 8 Gen 2 чипи билан жиҳозланган, бу ҳозирда мавжуд бўлган энг кучли мобил процессорлардан биридир. Мазкур процессор смартфонга энг қийин вазифаларни ҳам осонгина бажара олиш имкониятини тақдим қилади, ҳажми катта мобил ўйинларни ўйнаш вақтида телефон музлаб қолишининг олдини олади.
