Мадридда намойишчилар каталониялик айирмачиларга амнистия берилишига қарши чиқди

Испания пойтахти Мадридда 100 мингга яқин одам Испания бош вазири вазифасини бажарувчи Педро Санчеснинг Каталония айирмачиларига амнистия қўллаш режаларига қарши норозилик билдириш учун йиғилди. Бу ҳақда 29 октябр, якшанба куни El Pais хабар берди.

Намойиш «Амнистия ва Санчеснинг давлат тўнтаришига қарши!» шиори остида ўтказилди. Митингни ўнг қанот популистик партияси - Vox’га яқин жамғарма уюштирган, унинг раҳбари Сантяго Абаскал ҳам митингда иштирок этган. Худди шу акция Мадридда 24 сентябр куни бўлиб ўтган, ўшанда митингга 40 мингга яқин одам келганди. 

8 октябр куни Барселонада минтақанинг Испаниядан ажралиб чиқишига қарши курашиш мақсадида ташкил этилган «Каталония фуқаролик жамияти» ташкилоти томонидан каталониялик сепаратистларнинг амнистиясига қарши акция ташкил этилди. 

Санчес коалиция эвазига амнистия ваъда қилиши мумкин 

Испанияда 23 июл куни бўлиб ўтган парламент сайловлари натижаси бўйича ҳукмрон коалиция тузилмади. Санчес бошчилигидаги Испания Социалистик ишчилар партияси иккинчи ўринни эгаллади ва биринчиликни Халқ партиясидан консерваторларга бой берди. Қирол Филипп VI Халқ партияси етакчиси Алберто Нунес Фейхоога коалиция тузишни ишониб топширди, бироқ унинг номзоди парламент қуйи палатаси томонидан рад этилди. Энди Санчесга коалиция тузиш вазифаси қўйилган. 

У Каталония учун мустақилликка эришмоқчи бўлган ва 2017 йилда Каталония суверенитетини эълон қилишга уринган айирмачи сиёсатчиларга амнистия берилишини талаб қилаётган «Каталония сўл республикачилари» партияси кўмагисиз буни уддалай олмайди. Испания ҳукумати уларнинг бир қисмини 2021 йилда афв этган. 

«Биз испанлар Санчеснинг парламент эҳтиёжларида айбдор эмасмиз. Жиноят содир этганлар ҳукм қилиниши керак, биздан жиноят қилмаганлар эса ҳеч кимдан кечирим сўрамаслиги лозим», - деди Халқ партияси раҳбари Фейхоо Санчеснинг режалари ҳақида.