Москвалик юрак-қон томир жарроҳи бўлган Дилшот Мамадалиев 29 октябр куни кечқурун Маҳачқалъага учиб келганди — айнан аэропорт Тел-Авивдан рейс келаётганидан хабар топган ғазабнок оломон томонидан штурм қилинган паллада. Талончилар Дилшотни исроиллик деб ўйлашган ва уни сўроқ қилиб, паспортини олиб қўйишган. У BBC рус хизмати билан суҳбатда ўша оқшом бўлган воқеа тафсилотларини гапириб берди.
Дилшот Мамадалиев: «Самолёт Москвадан, Шереметеводан учди ва кечқурун соат еттида Маҳачқалага қўнди. Тел-Авивдан [Маҳачқалъага] халқаро рейс борлигини билмасдим ҳам.
У ерда икки терминал бор — ички ва халқаро рейслар учун. Мен ички рейслар қабул қилинадиган терминалга келдим ва юкларимни олдим. Атрофда мутлақо нормал вазият ҳукмрон эди, мен каби бошқа йўловчилар ҳам юкларини олиб, ўз йўлида, ўз хаёллари билан кетаётганди.
Мени олиб кетиш учун ҳайдовчи юборишганди, аммо кейин маълум бўлишича, у [аэропортга] кира олмаган, шу туфайли менга назорат-ўтказиш пункти томонга боришни тавсия қилишди. Хотиржам қадам ташлаб кириш эшиги томон юрдим, у ерда эса мени бир гуруҳ одамлар кутиб олди.
[Мени] ўраб олишди, қаердан учиб келганимни сўрашди. Мен Москвадан учиб келганимни айтдим. Сўзларимга ишонишмади, паспортни кўрсатишни сўрашди. Мен паспортни кўрсатдим, Смоленскда туғилганим, у ерда ўсганимни билдирдим. Чамадонда бирка бор эди, унда — «Шереметево аэропорти» кўрсатилганди.
Аммо [менга] негадир ишонишмади. Юзимдан шубҳаланишди шекилли, шунинг учун паспортим ҳақиқий ёки сохталигини текширишга киришишди.
[Бундан ташқари] мендан миллатим нималигини сўрашди. Мен ўзбек эканимни айтиб жавоб бердим. Бир киши мен ҳақиқий ўзбекманми ёки йўқлигини текширишга қарор қилди ва менга кўмиклар тилида (Доғистонда яшовчи халқ) гапирди. Бу ҳам турк тиллари гуруҳидаги тил ҳисобланади. Мен унга ҳеч нарса деб жавоб бера олмадим».
29 октябр куни тарқалган видеода Дилшот агрессив кайфиятдаги, баланд овозда гапираётган кишилар ўртасида тургани, атрофдагилар телефонлари камераларини унга қаратганини кўриш мумкин: «Нима сен ***** [алдамоқчимисан]?» «Чамоданини олинглар!».
