Ўзбекистоннинг янги тайинланган элчиси Абат Файзуллаев Италия президенти Сержио Маттареллага ишонч ёрлиқларини топширди.
«Дунё» хабарига кўра, тантанали маросим Италия президентининг Рим шаҳридаги расмий қароргоҳи – «Квиринале» саройида бўлиб ўтди.
Бўлиб ўтган суҳбат давомида Сержио Маттарелла жорий йилнинг 9-11 ноябр кунлари Ўзбекистонга амалга оширган расмий ташрифини ёдга олди ва ташриф унда унутилмас таассуротлар қолдирганини қайд этди.
Учрашувда икки мамлакат ўртасида стратегик мулоқотни илгари суришнинг юксак аҳамияти тасдиқланди, Ўзбекистон ва Италиянинг сиёсий, савдо-иқтисодий ва маданий-гуманитар ҳамкорлиги истиқболларидан самарали фойдаланишдан икки томон ҳам манфаатдорлиги таъкидланди.
Суҳбат якунида Италия президенти Ўзбекистоннинг бой тарихий ва маданий мероси ҳамда у зиёрат қилган Самарқанд ва Хива шаҳарларидаги қадимий обидалар жозибасини алоҳида қайд этди.
Абат Файзуллаев жорий йилнинг октябр ойида Ўзбекистоннинг Италиядаги элчиси этиб тайинланди. У 2020-2023 йилларда Ўзбекистоннинг Австриядаги элчиси бўлиб ишлаган, шунингдек, Венгрияда ўриндошлик асосида элчи бўлган. Бир вақтнинг ўзида, Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.
Абат Файзуллаев 2018-2023 йилларда Римдаги дипломатик ваколатхонага раҳбарлик қилган Отабек Акбаров ўрнига тайинланди.
