АҚШда ажалвор торнадо ва пўртана: Теннесси штатида олти киши ҳалок бўлган

Маҳаллий фавқулодда ёрдам кўрсатиш хизматлари хабар беришича, ўн минглаб кишилар электр таъминотисиз қолган, кўплаб бинолар вайрон бўлган.

Штат маркази Нэшвилл чеккасида уч киши ўлими қайд этилган.

Яна уч киши – катта ёшли икки киши ва бир бола – Нэшвиллдан тахминан 80 км шимоли-ғарбдаги Кларксвилл шаҳрида вафот этган.

Ижтимоий тармоқларда эълон қилинган видеода вайронага айланган бинолар, ағдарилган автомобиллар ва илдизи билан қўпорилган дарахтларни кўриш мумкин.

Кадрларда йирик торнадо устунлари ер юзаси бўйлаб ҳаракатланиб келаётгани ва осмонда ёрқин чақмоқ чақнашлари акс этган.

Кларксвилл таркибидаги Монтгомери округи шерифи офиси шаҳарда бир неча уй шикастланганини тасдиқлаган.

Шанба куни кечқурун Кларксвилл мэри фавқулодда ҳолат режими эълон қилган.

«Бу қайғули хабар, биз яқинларини йўқотганларга чин дилдан ҳамдармиз», – деган мэр Жо Питтс ва шаҳар ҳукумати уларни қўллаб-қувватлашга тайёр эканини маълум қилган.

Монтгомери округида 23 киши шифохонага ётқизилган.

poweroutage.us сайти маълумотига кўра, маҳаллий вақт билан якшанбага ўтар кечаси соат 3:00 ҳолатига Теннесси штатида қарийб 45 минг киши электр таъминотидан узилган.

Қўшни Алабама штатида ҳам минглаб кишилар чироқсиз қолмоқда.

Шанба куни Миллий метеорология хизмати Теннессида торнадо хавфи ҳақида бир неча бор огоҳлантириш берганди.