2024 йилда Қозоғистонда Марказий Осиё давлатлари иштирокида ҳарбий машғулотлар ўтказилади 

Қозоғистонда Озарбойжон ва Марказий Осиё давлатлари: Қирғизистон, Тожикистон, Ўзбекистон иштирокида жанговар тайёргарлик тадбирлари доирасида кенг кўламли ҳарбий машғулотлар ўтказилади. Бу ҳақда Қозоғистон Мудофаа вазирлиги хабар берди. 

«Бу йил мамлакатимиз ҳудудида бешта давлат иштирокида кенг кўламли ўқув машғулотлари бўлиб ўтади ва улар юқори ташкилий савияда ўтказилиши керак. Қардош халқлар ўртасидаги дўстона муносабатларни сақлаб қолиш биз учун ниҳоятда муҳим», деди Қозоғистон Мудофаа вазири Руслан Жаксиликов. 

Қозоғистон Мудофаа вазирининг биринчи ўринбосари, Қуролли Кучлар Бош штаби бошлиғи генерал-лейтенант Марат Хусаинов сўзларига кўра, 2024 йилда 160 дан ортиқ тезкор ва 70 мингдан ортиқ жанговар тайёргарлик тадбири ўтказилиши режалаштирилган бўлиб, улардан энг аҳамиятлиси Озарбойжон, Қирғизистон, Тожикистон ва Ўзбекистон ҳарбий-денгиз кучлари, Ҳарбий ҳаво кучлари, «Ғарбий» минтақавий қўмондонлигининг махсус операция бўлинмалари ҳамда ҳарбий контингентлари иштирокида ўтказиладиган «Бирлестик» машғулотларидир.