Тошкент вилояти ҳокими ўринбосарларидан бири ўзгарди

Чиноз тумани ҳокими Ботир Алимбеков Холмирза Ниёзов ўрнига Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари этиб тайинланди. Алимбеков аввал ҳам вилоят ҳокими ўринбосари бўлиб ишлаган.

Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари Холмирза Ниёзов лавозимидан озод этилди. Бу ҳақда вилоят ҳокимлиги матбуот хизмати хабар бермоқда.

Холмирза Ниёзов. Фото: Тошкент вилояти ҳокимлиги

Холмирза Ниёзов муқаддам Фарғона вилоятининг Олтиариқ тумани ҳокими бўлган, 2022 йил февралидан буён Тошкент вилояти ҳокими ўринбосари лавозимида ишлаб келаётганди.

Вилоят ҳокими Зойир Мирзаевнинг тегишли қарори билан Ботир Баҳодирович Алимбеков Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари вазифасини бажарувчи этиб тайинланди.

Ботир Алимбеков. Фото: Тошкент вилояти ҳокимлиги

Ботир Алимбеков 1978йилда Зангиота туманида туғилган. Маълумоти – олий. 1999 йилда Тошкент давлат аграр университетини, 2009 йилда президент ҳузуридаги Давлат ва жамият қурилиши академиясини (ҳозирги Давлат бошқаруви академияси) тамомлаган. Мутахассислиги – зоомуҳандис, иқтисодчи (қишлоқ хўжалиги).

У фаолияти давомида давлат солиқ инспектори (2002–2005), «Қишлоқхўжаликкимё» ҳудудий АЖ мутахассиси, туман филиали мудири, раис ўринбосари ва бошқарув раиси (2005–2016), Тошкент вилояти қишлоқ ва сув хўжалиги бошқармаси бошлиғи (2016–2017), «Тошкентагрокимёҳимоя» ҳудудий АЖ директорининг биринчи ўринбосари ва жамият директори (2017–2019) лавозимларида ишлаган.

2020 йил апрелидан 2021 йил январига қадар ҳам Тошкент вилояти ҳокимининг қишлоқ ва сув хўжалиги масалалари бўйича биринчи ўринбосари сифатида фаолият юритганди.

2021 йил январида Тошкент вилояти Чиноз тумани ҳокими лавозимига тайинланганди.

#Тошкент вилояти #тайинлов