Мариуполда сайловга тайёргарлик ва украинларнинг Купянск атрофидаги позициялари. Уруш суратлари

Украинада урушнинг 708-куни ўтди. Асосий маълумотлар:

Евроиттифоқ Украинага 50 миллиард евро миқдоридаги ёрдам пакетини маъқуллади. Шу пайтгача ёрдам ажратиш масаласини блоклаб келаётган Венгрия ҳам бунга рози бўлди. Шунингдек, Брюсселдагилар Россия давлат активларидан келадиган даромадларни Киев учун йўналтириш масаласини кўриб чиқишмоқда.
Россия Тергов қўмитаси маълум қилишича, ҳалокатга учраган Ил-76 самолётидаги барча йўловчиларнинг жасад қолдиқлари аниқланган. Терговчиларда самолёт бортида бўлган барча украиналик ҳарбий асирларнинг генетик профили мавжудлиги маълум қилинган.
Володимир Зеленский Украина ҚК бош қўмондони Валерий Залужнийни бир ҳафта ичида истеъфога чиқаради, деб хабар бермоқда CNN телеканали ўз манбаларига таяниб. Аввалроқ Украина президенти офиси Залужнийнинг истеъфоси тўғрисидаги барча хабарлар ҳақиқатга тўғри келмаслигини маълум қилганди. Украина мудофаа вазирлиги ҳам бош қўмондон ишдан бўшатилиши ҳақидаги хабарларни рад этган.
Украина разведкаси 1 февралга ўтар кечаси мамлакат қуролли кучлари Россия Қора денгиз флотининг «Ивановец» ракета катерини чўктириб юборганини маълум қилди. РФ мудофаа вазирлиги бу хабарни изоҳламаган. Кема бортида қанча одам бўлгани ва улар эвакуация бўлишга улгургани маълум эмас.
Туркиядаги банклар РФдан бўлган компанияларнинг ҳисобларини ёпмоқда ва Россиядан бўлган жисмоний шахслар учун талабларни қатъийлаштирмоқда.

Украинларнинг Купянск атрофидаги позициялари

Купянск — Харкив областидаги стратегик муҳим шаҳар бўлиб, бу ерда йирик темирйўл тугуни жойлашган. РФ армияси Купянскни 2022 йил 27 февралида эгаллаганди ва ундан шахсий таркиб ҳамда қурол-яроғларни олдинги чизиқларга ўтказиш учун фойдаланган. Украиналик ҳарбийлар 2022 йил сентябрида Купянскни озод этишганди.

Ҳозирда Россия қўшини яна ушбу шаҳарни эгаллаб олишга ҳаракат қилмоқда. Украиналик фотографлар Константин ва Влада Либеровлар Купянскка келиб, «Эделвейс» номли 10-алоҳида тоғ-штурм бригадаси ўз позицияларини қандай ушлаб туришгани ва ярадорларни олдинги чизиқдан қандай эвакуация қилишганини кадрларга муҳрлашди.