Yevropa Ittifoqi Ukrainaga 50 milliard yevro miqdoridagi yordamni ma’qulladi

Yevropa Kengashi raisi Sharl Mishel Yevropa Ittifoqi sammitida Ukrainaga 50 milliard yevrolik uzoq muddatli yordam dasturi ma’qullanganini e’lon qildi. Yordam paketi ittifoqning barcha 27 a’zosi, jumladan Vengriya bilan ham kelishilgan. 

«Bu Ukrainani barqaror, uzoq muddatli va kafolatlangan moliyalashtirish imkonini beradi. Yevropa Ittifoqi Ukrainani qo‘llab-quvvatlash uchun yetakchilik va mas’uliyatni o‘z zimmasiga oladi», deb yozdi Mishel ijtimoiy tarmoqda. 

Reuters manbalarining da’vo qilishicha, Yevropa Ittifoqi Kiyevga yordam ajratilishi masalasini har yili qayta ko‘rib chiqadi. Avvalroq Ukrainaga yillar davomida oldindan yordam ajratilishini ma’qullamagan Vengriya aynan shu variantni taklif qilgan edi. Bundan tashqari, Ukraina bo‘yicha kelishuvdan qat’i nazar, Yevropa Ittifoqining Budapesht uchun ajratgan mablag‘lari muzlatilgan holda qoladi. 

Navbatdagi 4 yil davomida Ukrainaga 50 milliard yevro ajratish masalasi bir necha oydan beri ko‘rib chiqilayotgan edi. U o‘z ichiga 17 milliard yevro grant va 33 milliard yevro miqdorida kreditni oladi. Rossiyaning Ukrainaga bosqini boshlanganidan beri YeI Kiyevga 85 milliard yevro miqdorida yordam yuborgan. 

2023 yil dekabrida bo‘lib o‘tgan sammitda 50 milliard yevro ajratish tashabbusi Vengriya tomonidan bloklangan edi. Budapesht nega bu safar vetoni bekor qilgani haqida hozircha izoh bermadi. Financial Times gazetasi sammit boshlanishidan sal avval agar Vengriya Ukrainaga yordamni yana to‘sib qo‘ysa, Yevropa Ittifoqi tomonidan iqtisodiyotiga putur yetkazish rejasi ishlab chiqilayotgani haqida yozgan edi.