Навалний қамоқхонада вафот этди. Асосий маълумотлар

Алексей Навалний қамоқхонада вафот этди, деб хабар берди Ямало-Ненецк автоном округи Жазони ижро этиш федерал бошқармаси (ЖИФБ). Идора маълумотига кўра, 47 ёшли сиёсатчи 3-рақамли ахлоқ тузатиш колониясида сайрдан кейин «ўзини ёмон ҳис қилган». Колониядаги шифокорлар ва чақирилган тез ёрдам ходимлари унга ёрдам беришга ҳаракат қилишган. «Барча зарур реанимация чоралари кўрилган, бироқ ижобий натижа бўлмаган. Тез тиббий ёрдам шифокорлари маҳкумнинг ўлимини тасдиқлади. Ўлим сабаблари аниқлаштирилмоқда», — дейилади бошқарма хабарида. Лабитнангидаги шаҳар шифохонасида «Интерфакс»га хабар беришларича (3-колония жойлашган Харп посёлкаси Лабитнанги шаҳар округи таркибига киради), шифокорлар бир ярим соатдан ортиқ вақт давомида сиёсатчини жонлантиришга уринган.

RT пропаганда телеканали Навалнийнинг ўлимига тромб кўчиши сабаб бўлгани ҳақида хабар тарқатди. Baza маълумотига кўра, Навалний тушки соат бир атрофида ҳушини йўқотган, шундан кейин тез ёрдам чақирилган. Шифокорлар Навалнийни қутқаришга уринишган, аммо соат 14:17 да унинг ўлими қайд этилган.

{Yii::t(}

Ўтказиб юбориш 6s

Ўтказиб юбориш

Навалнийнинг сафдошлари ҳозирча колониядан тасдиқланган хабарга эга эмасликларини айтишган. Сиёсатчининг матбуот котиби Кира Ярмиш Навалнийнинг адвокати Ямало-Ненецк автоном округига йўл олганини маълум қилган. «Бизда қандайдир маълумот бўлиши билан маълум қиламиз», — дея қўшимча қилган у. Алексей Навалнийнинг адвокати Леонид Соловёв «Новая газета»га сиёсатчининг оиласи қарорига кўра, ҳеч қандай қандай изоҳ бера олмаслигини маълум қилган. «Энди аниқлаштиряпмиз. Адвокат чоршанба куни [14 феврал] Алексейнинг ёнига борган. Ўшанда барчаси нормал бўлган», — деган у. Навалнийнинг онаси Людмила Ивановна ҳеч қандай ҳамдардлик сўзларини эшитишни истамаслигини билдирган: «12-куни колонияда ўғлимни кўргандим, учрашув бўлганди. Тирик эди, соғ эди, ҳаётдан хурсанд эди».

РФ президенти матбуот котиби Дмитрий Песков Навалнийнинг ўлими тўғрисидаги хабар Владимир Путинга етказилганини маълум қилган. У ҳозирда Челябинск областида бўлиб турибди. Песковнинг сўзларига кўра, Кремлда Навалнийнинг ўлими сабаблари бўйича маълумот йўқ, буни «тиббиёт ходимлари аниқлаши керак». Песков ЖИФБ Навалнийнинг ўлими билан боғлиқ барча текширувларни ўтказишини ва бу борада алоҳида топшириқ берилишига ҳожат йўқлигини қўшимча қилган. «Коммерсант» мухбири ва Путиннинг солномачиси Андрей Колесников Навалнийнинг ўлими ҳақидаги хабар президент учун кутилмаган ҳол бўлгани ва у «ўзини базўр тутиб қолгани» ҳақида айтган.

Тергов қўмитаси Алексей Навалнийнинг колониядаги ўлими факти бўйича тергов бошлаган, дея маълум қилган идора. Ўз навбатида, ЖИФБ 3-колонияга комиссия юборган. Ямало-Ненецк автоном округи Жамоатчилик кузатув комиссияси Навалнийдан соғлиқ бўйича шикоят келиб тушмаганини билдирган.

Бутун дунёдаги сиёсатчилар Навалнийнинг оиласига ва яқинларига ҳамдарлик изҳор этмоқда. Украина президенти Володимир Зеленский Навалний «Путин томонидан ўлдирилгани»ни айтди. РФ ТИВ расмий вакили Мария Захарова «НАТО давлатлари раҳбарлари Навалнийнинг ўлими юзасидан тезда реакция бериб Россияни тўғридан тўғри айблаш орқали ўзини ўзи фош қилаётгани»ни айтди. «Ҳали суд тиббиёт экспертиза йўқ, ғарбда эса хулосалар тайёр», — деган Захарова. Федерация кенгашининг халқаро ишлар бўйича қўмитаси раиси ўринбосари Владимир Джабаров Навалнийнинг ўлимини «бахтсиз ҳодиса» деб атаган. Унинг сўзларига кўра, Россияда «Навалнийнинг соғлигига зарар етказиш учун бирор сабаб бўлмаган».

Россия ва дунёнинг қатор шаҳарларида хотира акциялари ўтказилмоқда. Ўнлаб шаҳарларда сиёсий қатағонлар қурбонлари ёдгорликларига гуллар қўйилмоқда. Мухолифатчи сиёсатчи Михаил Ходорковский россияликларни 17 март куни РФ президентлиги учун сайловларга чиқиб, овоз бериш учун бюллетенларга Навалний деб ёзиб кетишга чақирди.

Алексей Навалний Россия президенти Владимир Путиннинг энг ашаддий танқидчиси ҳисобланарди. Россиядаги коррупцион ҳолатлар бўйича суриштирувлар билан танилган Навалнийнинг охирги суриштируви Владимир Путиннинг Геленжикдаги саройи ҳақида бўлганди.

Алексей Навалний 2021 йил январ ойидан буён қамоқда қолаётганди. «Новичок» моддаси билан заҳарланган Россия мухолифати етакчиси Германияга даволаниш учун борган ва қайтиши билан қўлга олинганди. Кейинчалик унинг «Ив Роше» иши бўйича шартли жазосини қамоқ жазосига алмаштиришди.

2022 йил март ойида Навалнийни фирибгарлик ва судга ҳурматсизликда айблаб яна 9 йил қамоқ жазосига ҳукм қилишди. 2023 йил «экстремистик жамият» тузишда айбланган сиёсатчини яна 19 йил қамоққа ҳукм қилиб, жазони махсус режимли қамоқхонада ўташни белгилашди.

Навалнийни аввалига Владимир областидаги 6-жазони ижро этиш колонасида сақлашганди. 2023 йил декабр ойида эса уни Ямало-Ненецк автоном округи Харп қишлоғидаги «Полярний волк» колониясига ўтказишганди.