Пичоқланган эркак ва бўғиб ўлдирилган аёл. Ҳуқуқни муҳофаза қилиш академиясида нималарни учратиш мумкин? 

2024 йил 15 феврал куни тергов ва прокуратура соҳасида кадрларни тайёрлаш, қайта тайёрлаш ва уларнинг малакасини ошириш тизими билан ўқувчиларни яқиндан таништириш мақсадида Ҳуқуқни муҳофаза қилиш академиясида очиқ эшиклар куни ташкил қилинди.

Экскурсия доирасида академияда Тошкент шаҳри мактаблари ва юридик техникум битирувчилари, ИИВ ҳузуридаги Тошкент шаҳри ва вилояти академик лицейлари ўқувчилари, академия талабаларининг ота-оналари, шунингдек ОАВ вакиллари тўпланди. Меҳмонларга ўқув дастурлари, фаолият йўналишлари, талабалар учун яратилган шароитлар ҳақида маълумотлар тақдим этилди.

Шунингдек, академиянинг махсус полигонида тергов-криминалистика тактикалари ва методикаларини амалий қўллаш имитацияси, воқеа жойини кўздан кечириш ва жиноятни очишга оид қизиқарли квест мусобақалари ўтказилди. Меҳмонлар суд имитацияси хонаси, экспертиза лабораторияси билан ҳам танишишди.

Ўзбекистон Республикаси Ҳуқуқни муҳофаза қилиш академияси Президентнинг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги Фармонига асосан Бош прокуратура Академияси негизида ташкил этилган. Ушбу ўқув даргоҳи ихтисослаштирилган олий таълим ҳамда илмий-тадқиқот муассасаси ҳисобланади.

Муассасада ҳуқуқни муҳофаза қилиш соҳасида икки босқичли тизим, яъни бакалавриат ҳамда магистратура босқичларида кадрлар тайёрланади, шунингдек, прокуратура органлари ходимлари, ваколатли давлат органларининг суриштирув ва тергов тузилмалари ходимларининг малакаси оширилади ҳамда қайта тайёрланади. Таълим даргоҳи 3 та факултет, 5 та марказ, 15 та бўлим, 13 та кафедрадан иборат. 

Академияда республика миқёсида биринчи бўлиб ташкил қилинган Dark web киберлабораторияси, шунингдек, мобил криминалистик автолабораториядан фойдаланиш ва тергов жараёнларида полиграф (детектор) технологияларини қўллаш имконияти ҳам мавжуд.

Диёрахон Набижонова тайёрлади.
Оператор ҳамда монтаж устаси: Абдуқодир Тўлқинов