Зеленский 19 октябр куни Украина Қуролли кучлари бош қўмондонининг ҳисоботига таяниб, мазкур маълумотларни Telegram’да эълон қилган, деб ёзади DW.

Бу ерда гап интернет орқали маълумот узатиш тезлиги эмас, сунъий йўлдош алоқаси ускунасини олиб юрган воситанинг ҳаракат тезлиги ҳақида бормоқда. Зеленскийнинг сўзларига кўра, узилишлар турли дронларга, айниқса, ўрта масофали аппаратлар ва реактив учувчисиз воситаларни тутиб қолувчи дронларга таъсир қилмоқда.

Украина президенти 17 октябрда ҳам шунга ўхшаш муаммони кўтарган эди. Ўшанда у алоқадаги чекловлар Россия дронлари ҳужумларини қайтаришга халақит бераётганини, Киев бу масалани АҚШ вакиллари билан муҳокама қилаётганини билдирган. Зеленскийга кўра, Америка томони чекловларни техник сабаблар билан изоҳлаган.

АҚШ давлат котиби Марко Рубио эса 17 октябрда Вашингтон Starlink ишини атайлаб чеклагани ҳақидаги даъволарни рад этган.

«Оқ уйда ҳеч ким интернетни секинлаштириш ёки маълумот узатиш тезлигини пасайтириш бўйича кўрсатма бермаган», — деган у. Рубио техник муаммоларнинг сабаби ҳали аниқ эмаслигини, бироқ тизимдан фойдаланиш имконияти тикланганини айтган.

Украина Мудофаа вазирлиги маълумотига кўра, Starshield’даги чекловлар 14 октябрга ўтар кечаси пайдо бўлиб, дронлар ва логистика ишини қийинлаштирган. Вазирлик 15 октябрда тизимнинг дала шароитидаги фаолияти тикланганини билдирган бўлса-да, Зеленскийнинг янги баёноти юқори ҳаракат тезлигида муаммолар сақланаётганини кўрсатмоқда.

Чекловларни ким жорий қилгани ҳақидаги хабарлар бир-бирига зид. The Telegraph манбалари бу ташаббусни Илон Маск илгари сургани, Доналд Трамп қўллаб-қувватлаганидан сўнг Пентагон лимитлар киритганини айтган. Reuters эса ўз манбаларига таяниб, кўрсатма Оқ уйдан берилганини хабар қилган.

Маск Starshield бўйича бундай қарорларни АҚШ ҳарбийлари ва якуний ҳисобда мамлакат президенти қабул қилишини таъкидлаган. Трамп эса 16 октябрда ўзи бундай кўрсатма бермаганини ва Маск ҳам берган деб ўйламаслигини айтган.

Шу билан бирга, Зеленский 19 октябрда Киевда Lockheed Martin вакиллари билан ҳаво мудофааси учун тутиб қолувчи воситалар етказиб беришни кўпайтириш масаласини муҳокама қилганини маълум қилди. У компания баллистик нишонларни тутиб қолиш воситалари ишлаб чиқаришини кенгайтираётгани, Украина уларнинг бир қисмини сотиб олишни кўзлаётганини билдирди.