Мирзиёев Путинни президент сайловидаги ғалабаси билан табриклади

РФнинг амалдаги президенти уч кун давом этган сайловларда рекорд натижа билан ғалаба қозониб, бешинчи муддатга сайланди.

Фото: Президент матбуот хизмати

Ўзбекистон президенти Шавкат Мирзиёев Россия Федерацияси президенти Владимир Путинни бўлиб ўтган президент сайловида қозонган ғалабаси билан табриклади.

«Давлатимиз раҳбари мактубида сайловчиларнинг юқори фаоллиги ва овоз бериш натижалари аҳоли Владимир Путиннинг сиёсати ва ижтимоий-иқтисодий ислоҳотлар дастурига ишонч билдираётгани ва уларни қатъий қўллаб-қувватлаётганининг навбатдаги ёрқин намойиши бўлгани таъкидланади.

Мамлакатимиз етакчиси Россия президентига мустаҳкам соғлик, бахт-саодат ва давлатчилик фаолиятида катта муваффақиятлар, Россия халқига эса тинчлик ва равнақ тилади», дейилади президент матбуот хизмати хабарида.

15-17 март кунлари Россияда президентлик сайлови бўлиб ўтди. РФ марказий сайлов комиссиясининг сўнгги маълумотларига кўра, бюллетенларнинг 99,45 фоизи ҳисоблаб чиқилганидан кейин, амалдаги президент Владимир Путин 87,32 фоиз овоз билан ғалаба қозонмоқда. Кейинги ўринларни мос равишда коммунистик партия (КПРФ) номзоди Николай Харитонов (4,3 фоиз), «Янги одамлар» партияси номзоди Владислав Даванков (3,79 фоиз) ва либерал-демократлар партияси раҳбари (ЛДПР) Леонид Слуцкий (3,19 фоиз) эгаллаган.

Шу тариқа, Путин бешинчи муддатга президентлик лавозимига киришади.