Судяларни эҳтиёт чораси сифатида қамоққа олиш тартиби ўзгармоқда

Судяларга нисбатан оғир жиноят айби қўйилганда ҳам эҳтиёт чораси сифатида қамоққа олиш мумкинлиги белгиланмоқда. Тегишли ўзгартиришни назарда тутувчи қонун Сенатнинг ялпи мажлисида қабул қилинди.

Судлар тўғрисидаги қонуннинг 64-моддасига мувофиқ, судяга нисбатан қамоққа олиш тарзидаги эҳтиёт чораси фақат унга нисбатан ўта оғир жиноят ёки одам ўлимига сабаб бўлган қасддан бошқа жиноят содир этганлик айби қўйилган ҳолларда қўлланилиши мумкин.

Сенат қабул қилган қонун билан бундай чора судяга нисбатан оғир жиноат содир этганлик айби қўйилган ҳолларда ҳам қўлланилиши мумкинлиги белгиланмоқда.

Олий суд раиси ўринбосари Шуҳрат Полванов сўзларига кўра, бу чора коррупцияга қарши курашиш мақсадида жорий қилиняпти.

«Жиноятларни оғир ёки ўта оғир деб таснифлайдиган бўлсак, коррупциявий жиноятлар оғир жиноятлар таркибига киради… Таклиф этилаётган норма судялар томонидан оғир жиноят содир этганликда, жумладан, коррупциявий жиноятларни ҳам содир этганликда айб қўйиладиган бўлса, қамоққа олиш тарзидаги эҳтиёт чорасини қўллашни назарда тутади. Бундай тажриба хорижий давлатларда, жумладан, қўшни Қозоғистон ва Украинада мавжуд. Бу нормадан мақсад судлар томонидан адолатли қарор чиқарилишига эришиш ва қонун устуворлигини таъминлаш ҳисобланади», деди у.