Ўзбекистонда 2024 йилнинг уч ойида 4 562 жиноят фош этилди ҳамда қидирувда бўлган 1 265 нафар шахс ушланди.
Бош прокуратура хабарига кўра, ҳуқуқбузарликлар ва жиноятчиликка қарши курашиш борасида тизимли ишлар амалга оширилмоқда. Кўрилган чоралар натижасида маҳаллаларнинг 7 762 тасида ёки 82,2 фоизида жиноят қайд этилмади. 1 364 таси ёки 14,4 фоизида жиноятчилик барқарор сақланиб қолинишига ва камайишига эришилди.
Тезкор-қидирув соҳасида ҳам назорат кучайтирилиб, ноаниқ шароитларда содир этилган 4 562 та жиноят фош этилиши ҳамда қидирувда бўлган 1 265 нафар шахснинг ушланиши таъминланди.
Терговга қадар текширув, суриштирув ва дастлабки терговда қонунчиликка риоя этилишини таъминлаш чоралари доирасида суриштирув ва тергов органларининг 10 602 нафар шахсга нисбатан 8 505 жиноят иши ўрганилиб, судларга юборилди. Бевосита прокуратура органлари томонидан 2 323 жиноят иши юзасидан дастлабки тергов ўтказилиб, 1 960 нафар шахсга нисбатан 1 288 жиноят иши судларга юборилди, жиноят оқибатида етказилган 602,5 миллиард сўмлик зарар ундирилди.
