Қабристонда сақлаб келинган милтиқ ва сўнгги ўқ – Намангандаги бир жиноят тафсилоти

Тонгда отилган ўқ

2026 йилнинг 12 марти. Рўза кунлари. Соат тахминан 4:00. Мингбулоқ туманидаги Қорашаҳар маҳалласида яшовчи Маҳмуд (мақоладаги барча исмлар ўзгартирилган) саҳарлик қилиш ниятида уйғониб, ташқарига чиқди.

Атроф қоронғи, фақат ҳовлининг чироқ ёқилган қисми ёруғ эди. Маҳмуд юз-қўлини ювишга чоғланган пайтда кутилмаганда айвон томондан милтиқ овози эшитилди. Унга чамаси 10 метр наридан кимдир ўқ узганди.

Барчаси сониялар ичида содир бўлди: Маҳмуд нима бўлганини англамай ҳам қолди ва кўксини чангаллаб йиқилди. У ҳушидан кетганди. Милтиқ овозини эшитган аёл уйдан югуриб чиқди ва эрининг қонга беланиб ётганини кўрди. У шовқин кўтариб, атрофдагиларни ёрдамга чақира бошлади.

Бу пайтда милтиқ кўтарган одам ҳовлига қандай яширинча кирган бўлса, шундай чиқиб кетганди.

Ҳодиса жойига қўни-қўшнилар йиғилди. Маҳмуд тезкорлик билан шифохонага олиб кетилиб, жонлантириш бўлимига ётқизилди. Ўз вақтида кўрсатилган тиббий ёрдам натижасида унинг ҳаёти сақлаб қолинди.

Мулк низоси

Маҳмуднинг отиб кетилгани хабари тонгда бутун маҳаллага тарқалди. Одамлар уни ким отганини муҳокама қилишарди. Кўп ўтмай, бу ишни ким қилгани ойдинлашди: у бегона эмас, Маҳмуднинг 73 ёшли амакиси Мансур Ҳамроев эди. 

Амаки ўз жияни билан уй масаласида низолашиб келган. Гарчи эгалик ҳуқуқи Маҳмуднинг отасига тегишли бўлса-да, Мансур Ҳамроев уйнинг бир қисми ўзига тегишли эканини даъво қилиб келган.  

Мансур Ҳамроев 2025 йил 22 май куни Наманган туманлараро маъмурий судига ариза киритган. У аризада Мингбулоқ тумани ҳокимининг 2020 йил январдаги қарори бир қисмини ҳақиқий эмас деб топишни сўраган. Бироқ суд унинг даъвосини рад этган. Амаки бундан қаттиқ ғазабланган ва ушбу ҳолатда жиянини айбли деб ҳисоблаб, уни ўлдириш ва уйга эга чиқиш бўйича режа тузган. 

Қабристондаги милтиқ

Мансур Ҳамроев қабристонда ишлаган. У қабристондаги бинода сандиқ ичида рухсатномаси бўлмаган ов милтиғи ва бир дона ўқ сақлаб келган.

Амаки ана шу ов милтиғи билан қуролланиб, 12 март куни ярим тунда жиянининг уйига келган. У ҳовлига яширинча кириб, уйнинг айвон қисмига беркинган ҳамда Маҳмуднинг уйдан чиқишини кута бошлаган. 

Кўп ўтмай жияни ташқарига чиққан ва хонадоннинг ҳовли қисмида юз-қўлини юва бошлаган. Шунда Мансур Ҳамроев қулай фурсат келганини тушуниб, ов қуроли билан жиянига қарата ўқ узган. Сўнгра жиянининг турмуш ўртоғи  югуриб чиқиб шовқин кўтара бошлаганидан қўрқиб кетиб, ҳодиса жойидан қочиб яширинган.

“Қўрқитиб қўймоқчи эдим”

Мансур Ҳамроев судда айбига иқрор бўлган. У ўз кўрсатмасида жияни ота уйига киритмай қўйганини айтган.

“Отам 1998 йилда вафот этган. Ота уйимда акам қолган, мен эса алоҳида уй қилиб, чиқиб кетгандим. Отам вафотидан кейин у уйга бориб, тиловат қилиб турардим.

Акам 2018 йилда вафот этди. Шундан сўнг жияним ота уйимга борган вақтларимда ҳар хил ноўрин гапларни гапираверди. Бора-бора мени ота уйимга умуман киритмай қўйди. Шу ҳолатдан сўнг уйни қайтариб олиш учун судга ариза ёздим. Лекин суд жияним фойдасига қарор чиқарди.

Акам кўп тушимга кириб, уйдан хабар олиб тур, деб айтарди. Ўша куни у яна тушимга кирди ва Маҳмудни отиб ташлашимни айтаверди. Қабристонда сандиқда сақлаб келган ов милтиғини олдим. Унинг бир дона ўқи бор эди. Маҳмудни қўрқитиб қўйиш мақсадида ота уйимга бордим. Жияним ҳовлида юрганини кўриб, қўрқитиш мақсадида у томонга қарата ўқ уздим. Қоронғи бўлгани учун ўқ унга текканини кўрмадим”, деган Мансур Ҳамроев ўз кўрсатмасида.

Шундан сўнг у ҳодиса жойидан қочиб кетиб, қабристонга борган. Милтиқни шу ердан оқиб ўтган дарёга улоқтирган. Сўнгра қилмишидан пушаймон бўлиб, ўзи ИИБга хабар қилган ва бўлиб ўтган ҳолатни айтиб берган.

Мансур Ҳамроев ов қуролини 2015 йилда акаси қолдириб кетганини, шундан бери қабристонда сақлаб келганини айтган. Шу тариқа, у акаси берган милтиқ билан унинг ўғлини отган. Мансур Ҳамроевда қурол борлигини ҳеч ким билмаган.

“Танамда 62 та из қолди”

Маҳмуд судда ўз амакисидан бунақа ҳаракат кутмаганини маълум қилган.

“Пақиллаган баланд овоз эшитилди. Ҳушимни йўқотдим. Ўзимга келганимда шифохонада эканимни билдим.

Отган шахс уйнинг орқа томонидан кириб ўқ узган ва яна ўша томондан қочиб кетганди. Ўқ узилган ва мен турган жой орасидаги масофа тахминан 10 метр атрофида эди. Ўша куни уйда амакимни кўрмадим. Менга ўқ узган одам амаким эканини терговда билдим.

Танамда жами 62 та ўқ излари бор, 6-7 таси бошимга ҳам теккан, учтасини шифокорлар олиб ташлашди”, деган жабрланувчи.

Шунингдек, Маҳмуд амакисининг фарзандлари билан алоқалари яхши эканини, унга нисбатан даъвоси йўқлигини айтиб, суддан Мансур Ҳамроевга енгиллик беришни сўраган.

Судда Маҳмуднинг турмуш ўртоғи ҳам кўрсатма берган. У ўша куни воқеадан олдин уйларидаги ит ипини узгудек бўлиб ҳурганини айтган.

“Ошхонада саҳарликка тайёргарлик кўраётгандим, бирдан банғиллаган овоз эшитилди. Газ баллони отилди деб ўйладим ва ўзимни йўқотиб қўйдим. Шу вақтда турмуш ўртоғим мени чақирди. Олдига борсам, қонга беланиб ётган экан. Шундан сўнг қўшниларни чақирдим, тез ёрдамга мурожаат қилдим”, деган аёл.

Жазо

1953 йилда туғилган Мансур Ҳамроевга нисбатан қўзғатилган жиноят иши ЖИБ Мингбулоқ туман судида кўриб чиқилиб, ҳукм ўқилди.

Суд ҳукми билан Мансур Ҳамроев Жиноят кодексининг 25,97-моддаси (қасддан одам ўлдиришга суиқасд қилиш) 2-қисми “и” банди ва 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 1-қисмида назарда тутилган жиноятларни содир этганликда айбли деб топилди. Унга 8 йил-у 1 ой муддатга озодликдан маҳрум қилиш жазоси тайинланди. Жазони умумий тартибли колонияда ўташ белгиланди. 

Суд материаллари асосида тайёрланди