Германиядан камида иккита компания - Knauf ва WKB Systems - Мариуполда фойдаланиш учун қурилиш материалларини етказиб беряпти, бу ҳақда ARD каналидаги Monitor теледастури томонидан олиб борилган суриштирув натижаларида айтилган.
Россиянинг Украинага қарши уруши пайтида рус қўшинлари томонидан вайрон қилинган ва эгаллаб олинган Мариупол шаҳрини қайта тиклашда Германия компаниялари иштирок этмоқда. Германиянинг ARD ижтимоий-ҳуқуқий телеканалининг 3 апрел, чоршанба куни чоп этилган Monitor дастури журналистлари суриштирувида шундай хулосага келинган.
Нашрнинг ёзишича, немис компанияларининг РФ ҚК томонидан эгаллаб олинган ва Россия ҳудуди деб эълон қилинган, уруш пайтида вайрон бўлган Украина шаҳрини тиклашда иштирок этгани ҳақидаги далилларни излашда журналистлар қурилиш компаниялари, бизнес сайтлари маълумотлари, ҳужжатлар, фото- ва видеоматериалларга таянган.
Мариуполдаги қурилиш майдончаларида Knauf цементи
Хусусан, Мариуполдаги кўплаб қурилиш майдончаларида Knauf томонидан ишлаб чиқарилган цемент ишлатилади, дея таъкидлайди журналистлар. ARD маълумотларига кўра, ҳозирги кунга қадар Knauf Россияда 4000 ходим ва миллиардлаб рубллик айланмага эга. Таҳририят томонидан сўралганда, компания Россиянинг Украинага қарши урушини қоралашини ва РФга қарши ЕИ барча санкцияларига риоя қилишини билдирди. Россияда ишлаб чиқарилган Knauf маҳсулотлари «фақат Россия бозори учун» мўлжалланган, дея қўшимча қилди матбуот хизмати. Таҳририят томонидан берилган саволларнинг кенг рўйхатига ҳеч қандай жавоб олинмади, деб таъкидлайди ARD.
Бундестагнинг ташқи ишлар қўмитаси раҳбари Родерих Кизеветтер немис компанияларининг эгаллаб олинган шаҳардаги қурилиш ишларида иштирок этишини қоралаб, уларнинг хизматлари халқаро ҳуқуқни бузаётган уруш фойдасига ишлайди, деб ҳисоблади.
WKB Systems бетон блоклари
Бундан ташқари, Мариуполдаги қурилиш майдончаларидан олинган фотосуратлар ва видеоларда ARD журналистлари Шимолий Рейн-Вестфалиядаги Мюнстерланд минтақасидан бўлган WKB Systems немис компанияси номи ёзилган яшил қадоқли плёнкадаги бетон блокларини пайқади. Бошқа нарсалар қаторида, ушбу компания бетон блоклар ишлаб чиқариш учун заводларни жиҳозлайди.
Компаниянинг асосий акциядори россиялик тадбиркор Виктор Будариндир. «Monitor’да мавжуд бўлган божхона маълумотлари шуни кўрсатадики, WKB Systems GmbH бир неча йиллардан буён Будариннинг рус компанияларидан бирига газбетон блокларни ишлаб чиқариш бўйича бутун қурилмаларни етказиб берган - афтидан, Россия Мариуполда ўз кучини мустаҳкамлаш учун маҳсулотидан фойдаланаётган компанияга», - дейилади терговда.
Унда айтилишича, Бударинга қарши ЕИ санкциялари қўлланмаган. WKB Systems журналистларнинг изоҳига жавоб бермади.
