Ню-Йоркда яшовчи тадбиркор Россияга қарши санкцияларни бузганлик бўйича айбини тан олди

Ню-йорклик Николай Григорев Россия ҳарбий учувчисиз учоқларида қўлланадиган АҚШнинг икки томонлама электрон компонентларини ноқонуний равишда Россияга экспорт қилиш бўйича тил бириктирганлик бўйича айбига иқрор бўлди. АҚШ Адлия вазирлиги 30 апрел, сешанба куни маълум қилишича, 36 ёшли эркакнинг компанияси Россия Қуролли кучлари билан боғлиқ санкция остидаги Россия компаниясига технология экспорт қилган.

Тадбиркор ҳужумкор дронлар учун бутловчи қисмларни сотган 

«Бугун ўз айбига иқрор бўлар экан, судланувчи Украинага қарши ноқонуний урушни қўллаб-қувватловчи Россия компанияларига 250 минг доллардан ортиқ қийматдаги АҚШнинг учувчисиз учиш қурилмалари технологиясини контрабанда қилиш мақсадида тил бириктирганини тан олди», — деди бош прокурор ўринбосари Лиза Монако.

Унинг сўзларига кўра, кўп сонли сохта буюртмалар ва электрон ўтказмаларни ўрганган ҳуқуқ-тартибот идоралари ходимларининг тезкор ҳаракатлари натижасида 11,5 мингдан ортиқ электрон компонентлар Россия Федерацияси ҳарбий-саноат мажмуасига етиб боришига йўл қўйилмаган. «Адлия вазирлиги Россиянинг Украинага қарши асоссиз тажовузини қўллаб-қувватлаш учун бизнинг санкцияларимиз ва экспорт назоратимизни эътиборсиз қолдирганларни – улар Ню-Йоркда ёки хорижда жойлашган бўлсин, жавобгарликка тортишда давом этади», — деди Монако.

Айбланувчилар АҚШ санкцияларини четлаб ўтишни очиқ муҳокама қилган

Яна икки айбланувчи – Никита Архипов ва Артем Оловянников озодликда қолмоқда. Тергов маълумотларига кўра, Григорев Бруклиндаги Quality Life Cue LLC (QLC) компанияси орқали экспорт қилган. У ва Оловянников томонидан рўйхатга олинган ҳамда назорат қилинган, Архипов эса Россиядан QLC электрон почтадан фойдаланган. Айбланувчилар ушбу компания орқали Россиядаги Украинага қарши уруш учун учувчисиз учоқларни ишлаб чиқарувчи корхоналарга икки мақсадли электрон компонентлар сотиб олган, дейилади баёнотда.

Ушбу ташкилотларнинг энг кўзга кўринганлари Россиянинг SMT-iLogic технология компанияси бўлиб, у 2023 йил май ойида Россия ҳарбий учувчисиз учоқларини ишлаб чиқариш бўйича етказиб бериш занжири иштирокчиси сифатида санкция остига тушган эди. Тергов маълумотларига кўра, 2021 йил 22 октябрдан 2022 йил 22 февралгача SMT-iLogic’дан QLC ҳисобларига тахминан 272 830 АҚШ доллари миқдоридаги пул ўтказмалари келиб тушган. Электрон почта ёзишмаларида айбланувчилар АҚШ экспорт чекловларини четлаб ўтишга уринишларни, шу жумладан Қозоғистон каби учинчи мамлакатлардаги сохта компанияларидан фойдаланишни очиқ муҳокама қилган. 

Ўз айбига иқрор бўлганини инобатга олган ҳолда, Григорев 5 йилгача қамоқ жазосига ҳукм қилиниши мумкин, дейилади баёнотда.