Полшада Беларус билан чегарада россиялик аскар қўлга олинди

Полша чегарачилари Россия армиясидан қочиб кетган россиялик аскарни қўлга олди. Полша чегара хизматининг 8 май, чоршанба куни хабар беришича, 41 ёшли эркак бир гуруҳ муҳожирлар билан бирга Беларус-Полша чегарасини ноқонуний кесиб ўтган ва Полша ҳудудида қўлга олинган. 

Департамент ходимлари қўлга олинган шахсдан унинг Россия армиясидаги хизмати ва Украинага қарши урушда қатнашганлигини тасдиқловчи ҳарбий ҳужжатларни топди. Полшанинг Rmf.fm радиостанцияси хабар беришича, россиялик қуролсиз ва фуқаролик кийимида бўлган, муҳожирлар орасида юрган. Rmf.fm маълумотларига кўра, қўлга олинганнинг ҳарбий ҳужжатлари орасида армия билан тузилган шартнома ҳам бор эди, эҳтимол у Беларус орқали тўғридан тўғри фронтдан Полша ҳудудига кирмоқчи бўлган.

Ҳозирда россиялик чегара хизмати томонидан қўлга олинган ва унга нисбатан тергов ҳаракатлари олиб борилмоқда. Полша ички ишлар вазири ўринбосари Чеслав Мрочек PAP ахборот агентлигига берган интервюсида шундай деди: «Биз унинг нияти нима эканлигини аниқлашимиз керак. Гап Россия разведка хизматларининг буйруғини бажариш ҳақида кетяптими ёки йўқми, шу масала муҳим».

Полша-Беларус чегарасидаги инқироз

2021 йилнинг ёзидан буён ўн минглаб кишилар Беларус ҳудудидан Полшага ноқонуний киришга ҳаракат қиляпти. Европа Иттифоқи Беларус раҳбари Александр Лукашенкони Ғарбга босимни кучайтириш мақсадида Яқин Шарқ ва Африкадан мигрантларни ЕИ чегараларига ўтказишни уюштирганликда айблади. 

2022 йилда Полша Беларус билан чегарадош томонида баландлиги 5,5 метр бўлган панжара ва электрон кузатув тизимини ўрнатди. Бироқ чегара тўсиқлари қурилганидан кейин ҳам муҳожирлар ҳар куни Европа Иттифоқининг ташқи чегарасини ноқонуний кесиб ўтишга уринмоқда, дея қайд этади Полша расмийлари. Йил бошидан бери Полша чегара хизмати 10 мингдан ортиқ бундай уринишларни қайд этган.