Блинкен: Украина 2 млрд долларлик ҳарбий ёрдам олади

АҚШ давлат котиби Энтони Блинкен Украинага 2 миллиард долларлик ҳарбий ёрдам пакетини эълон қилди. Бу пакет Украинани зудлик билан қурол-яроғ билан таъминлаш, Киевга бошқа давлатлардан қурол сотиб олишга ёрдам бериш ва Украина инфратузилмасига сармоя киритиш учун мўлжалланган, деди Америка ташқи сиёсат бўлими раҳбари 15 май, чоршанба куни Киевга ташрифи чоғида.

Блинкен Киевда Украина ташқи ишлар вазири Дмитрий Кулеба билан бўлиб ўтган қўшма матбуот анжумани чоғида: «Биз Украина бугун жанг майдонида муваффақият қозонишини таъминлаш учун ишлаяпмиз», деди. Шу билан бирга, давлат котиби Украинага келажакда ўз ҳудудидаги ҳужумларни қайтариш, Украина халқининг ўз келажагини мустақил белгилаш ҳуқуқини амалга ошириш имконини берадиган шароит яратиш муҳимлигини таъкидлади.

Бир кун аввал Блинкен Украина президенти Володимир Зеленский билан учрашди. Бу 2022 йил февралида Россиянинг Украинага қарши уруши бошланганидан бери АҚШ давлат котибининг Киевга тўртинчи ташрифи бўлди. Бу, шунингдек, АҚШ Конгресси бир неча ойлик кечикишдан кейин Киевга 61 миллиард доллар миқдорида ҳарбий ёрдам ажратишни маъқуллаганидан кейин унинг Украина пойтахтига биринчи ташрифидир.

Украинанинг жанг майдонидаги қийинчиликлари

Қурол-яроғ, ўқ-дорилар ва аскарлар танқислигини бошдан кечираётган Украина бир неча ойдан бери мудофаага ўтиб, рус қўшинларининг ҳужумини тўхтатиб келмоқда. Икки йилдан ортиқ вақтдан бери Украинага қарши уруш олиб бораётган Россия ўтган ҳафта Харкив вилоятида янги фронт очиб, чегара ҳудудидаги ўнга яқин Украина қишлоғини эгаллаб олди. Украина қуролли кучлари аскарлари айрим позицияларни тарк этишга мажбур бўлди. Зеленский фронтдаги оғир вазият туфайли яқин кунларда барча хорижий сафарларини бекор қилди.

Дмитрий Кулеба Блинкен билан қўшма матбуот анжумани чоғида Украинада зудлик билан яна еттита Patriot зенит-ракета комплексига эҳтиёж борлигини яна бир бор таъкидлаб, Харкив вилояти мудофааси учун яна иккита шундай тизим кераклигини қўшимча қилди. Шунингдек, у иттифоқчи давлатларни Украинага ваъда қилинган қуролларни етказиб беришни тезлаштиришга чақирди.