Сергелидаги айрим йўллар бир ойга ёпилди

Ҳудудда эскирган иссиқлик қувурини алмаштириш ишлари бошланган.

Тошкент шаҳрининг Сергели туманидаги айрим йўллар бир ойга ёпилди. Бу ҳақда Veolia Energy Tashkent компанияси хабар берди.

Қайд қилинишича, 29 майдан 30 майга ўтар кечаси эскирган 510 метр иссиқлик қувурини алмаштириш ишлари бошланган. Шу сабабли Сергели туманидаги айрим йўлларнинг қатнов қисми ёпилган.

Йўл ҳаракати чеклови Обиҳаёт кўчаси бўйлаб Сергели ярмаркаси чорраҳасидан «Havas» супермаркетигача бўлиши таъкидланмоқда.

Компания иш ҳажми катта бўлгани сабабли қувур алмаштириш ишлари учун тахминан бир ой вақт кетишини маълум қилган.