Жоржияда 2020 йилги сайлов натижаларига таъсир ўтказишга уриниш бўйича суд жараёни суд прокурор Фани Уиллисни лавозимидан четлаштириш тўғрисида қарор қабул қилганидан сўнг давом этади.
Жоржия апелляция суди 6 июн, пайшанбага ўтар кечаси ушбу штатда 2020 йилги сайлов натижаларини бекор қилишга уринишда айбланаётган АҚШ собиқ президенти Доналд Трамп устидан суд жараёнини тўхтатди. Суд Трампнинг иши судялар ҳайъати Фултон округи прокурори Фани Уиллисни четлаштириш керакми ёки йўқми, шу масала бўйича бир тўхтамга келгунча тўхтатиб турилишини маълум қилди. Собиқ президентнинг адвокатларига кўра, Трамп устидан тергов бошлаган ва уни олиб боришни махсус прокурор Нейтан Уэйдга ишониб топширган демократ Уиллис у билан шахсий муносабатларга эга, бу эса манфаатлар тўқнашуви деганидир.
Суд 4 октябр куни томонлар учун суд мажлисини белгилади, шунинг учун апелляция бўйича қарор Доналд Трамп жорий йилнинг ноябр ойига режалаштирилган сайловларда иштирок этганидан кейин қабул қилиниши кутилмоқда.
CNN: «Собиқ президент учун катта ғалаба»
CNN телеканалининг таъкидлашича, Жоржия апелляция судининг 5 июндаги қарори «собиқ президент учун катта ғалаба, у кейинги ҳуқуқий муаммоларни тўғридан тўғри енгиб чиқа олмаса, 2025 йилгача кечиктиришга ҳаракат қилмоқда».
Доналд Трампнинг ўзи 5 июн куни кечқурун суд қарорини шарҳлар экан, май ойининг охирида у актрисага сукут сақлаш учун пул тўлаганликда айбдор деб топилганига қарамай, «ишлари жуда яхши» кетаётганини айтди. «Бугун Жоржияда катта воқеа содир бўлди», дея қўшимча қилди у.
Трампдан ташқари, унга алоқадор яна 18 киши Жоржияда 2020 йилги сайловларга аралашишга уринишда айбланган.
