Жаҳон | 18:50 / 18.06.2024
8651
2 дақиқада ўқилади

Туркия Россияга «Крокус»дан кейин янги терактнинг олдини олишга ёрдам берди — ОАВ

Террорчилар гавжум савдо марказига ҳужум қилмоқчи бўлган, бироқ Туркиянинг аралашуви туфайли жиноятнинг олди олингани таъкидланмоқда. 

Фото: Reuters

Туркия разведка хизматлари Россияни «Крокус Сити Холл» концерт залига уюштирилган ҳужумдан кейин яна бир теракт тайёрланаётгани ҳақида огоҳлантирди. Бу ҳақда Hurriyet газетаси ёзди. 

Қайд қилинишича, террорчилар гавжум савдо марказига ҳужум қилмоқчи бўлган, бироқ Туркиянинг аралашуви туфайли жиноятнинг олди олинган. Бу ҳақдаги маълумот «Крокус»даги теракт учун масъулиятни ўз зиммасига олган «Вилояти Хуросон» гуруҳининг қўлга олинган беш нафар тарафдоридан олинган. 

Газета теракт уюштирилиши режалаштирилган савдо маркази номи ва санаси ҳақида маълумот бермади.

«Крокус Сити Холл»га ҳужум 22 март куни кечқурун «Пикник» рок гуруҳининг концертидан олдин содир бўлди. Қуролланган одамлар томошабинларни ўққа тутди. Оқибатда 150 нафарга яқин одам ҳалок бўлди, 550 нафардан ортиғи жабрланди. 

Теракт бўйича очилган жиноят иши доирасида 20 киши ушланди, улардан 18 нафари ҳибсга олинди, жумладан, ҳужумнинг бевосита иштирокчилари экани айтилаётган Тожикистон фуқаролари Далержон Мирзоев, Шамсиддин Фаридуни, Муҳаммадсобир Файзов ва Саидакрами Ражабализода. Улардан икки нафари терактдан сал аввал Туркияда бўлган. 

Россиядаги воқеалардан кейин Туркияда ИШИД тарафдорларига қарши бир қанча амалиётлар ўтказилди. 2023 йил июнидан 2024 йил мартигача, расмий маълумотларга кўра, Туркияда ИШИДга алоқадор деярли 3 минг киши аниқланган. 

Мавзуга оид