Венгрия бош вазири Виктор Орбан Киевда Володимир Зеленскийга ўт очишни тўхтатиш ва Владимир Путин билан музокаралар столига ўтиришни таклиф этди, бу билан эса москвапараст сиёсатчи сифатидаги репутациясини тасдиқлади. Орбан Украинага Венгрия ярим йил муддатга ЕИ кенгашига раҳбарликни ўз зиммасига олган куннинг эртасига келди. BBC ушбу ташриф якунлари ҳақида ёзди.
«Ташрифнинг асосий мавзуси — тинчликка эришиш имкониятлари», — дея учрашув кун тартибини тасвирлаганди Орбаннинг матбуот котиби Берталан Ҳавашининг сўзларини келтирган ҳолда Reuters агентлиги.
«Бугун биз адолатли ва узоқ муддатли тинчликни қандай таъминлаш ҳақида гаплашамиз», — дея ёзганди Зеленский ўз телеграм-каналида.
Аммо музокаралар якунларига кўра келишув истиқболлари ҳақида фақат Венгрия бош вазири баёнот берди.
«Тинчлик бу — муҳим масала. Сизлар яшаётган уруш шароити айни пайтда Европа хавфсизлигига ҳам интенсив таъсир ўтказмоқда. Биз, албатта, жаноб Зеленскийнинг тинчликка эришиш бўйича барча ташаббусларини юқори баҳолаймиз. Мен Зеленскийга бу ташаббуслар жуда кўп вақтни талаб этишини айтдим. Айнан халқаро дипломатия қоидаларига кўра улар жуда мураккаблаштирилган», – дея Орбандан иқтибос келтирган «Интерфакс-Украина».
« Мен Зеленскийдан бошқача йўл тутиш ҳақида ўйлаб кўришни сўрадим: аввал ўт очишни тўхтатиш, сўнгра тинчлик ҳақида музокаралар ўтказиш. Чунки ўт очишнинг тўхтатилиши бундай музокараларнинг тезлашишини таъминлаши мумкин», – деган Орбан музокаралардан кейин ўз ташаббуси моҳияти ҳақида.
Володимир Зеленский Орбаннинг таклифига жавоб бермаган, фақат украинларнинг «тинчлик формуласи»ни муҳокама қилиш учун Швейцарияда ўтказилган тинчлик саммитидаги коммюникени қўллаб-қувватлагани учун Венгрияга миннатдорчилик билдирган.
«Формула»нинг ўнта пункти қаторида — Украинанинг ҳудудий яхлитлигини тиклаш, Россия қўшинини Украина ҳудудидан олиб кетиш, Россияга товон пули тўлатиб, жазолаш кабилар ўрин олган.
Москва эса ўт очишни тўхтатиш ва музокараларни бошлашга тайёрлигини маълум қилган, аммо бунинг учун Киевга қатор шартлар қўйган: украин қўшинларини Луҳанск, Донецк, Запорижжя ва Херсон областларидан олиб чиқиш, НАТОга аъзо бўлиш режасидан воз кечиш, Россияга қарши санкцияларни бекор қилиш ва ҳоказо.
