Дунёни ҳайратлантираётган Хитой. Янги автомобил йўли 10 та рекордни янгилади

Хитойда фойдаланишга топширилган янги автомобил йўли ўнта дунё рекордини янгилади. Бу йўл Шэнчжен ва Чжуншан шаҳарларини боғлайди. Аввал бу икки шаҳар орасидаги масофани босиб ўтиш учун икки соат вақт сарфланган бўлса, энди манзилга 30 дақиқада етиб олиш мумкин. Йўлнинг 6,8 километри туннел ва 17,2 километри сув устида қурилган кўприкдан иборат.

Сўнгги 20 йилда Хитой қурилиш соҳасида жуда катта ютуқларга эришди. Айниқса тезюрар поезд ва автомобил йўллари қурилишида улкан натижаларга эришди.

Бугун Хитойда автомобиль йўллари ўтган 300 мингта кўприк бор. Уларнинг мингдан ошиғи 1 километрдан узун. Умумий фойдаланувдаги автомобил йўллари бўйича Хитой АҚШ ва Ҳиндистондан кейинги учинчи ўринда туради.

Тез ҳаракатланса бўладиган йўллар бўйича эса Хитой дунёда мутлақ етакчи. Бундай тезкор йўлларнинг асосий қисми сўнгги йигирма йилда қурилди. Бу борада хитойликлар “янги Америка кашф этишмади”.

Шунчаки ҳукумат иқтисодиётнинг ўсиши ҳисобига йўлларда юк ташиш ҳажми ошаётгани, автосаноат ривожланиб, йўлларда машиналар кўпайганини инобатга олиб йўллар қурди.

Бундан бир неча кун олдин Хитойда тез ҳаракатланиш мумкин бўлган яна бир автомобил йўли фойдаланишга топширилди. Бу йўл дунёдаги 10 та рекордни янгилади.

Қарийб 7 миллиард доллар сарфланган ушбу лойиҳа қурилиши 2017 йилда бошланганди. Шу тариқа, 6,8 км узунликдаги туннел ва 17,2 км узунликдаги иккита кўприк Шэнчжен ва Чжуншан шаҳарларини энг қисқа йўл орқали боғлади.

Йўлдан ташқари яна иккита сунъий орол ва сўнгги инновация лойиҳалари асосида дунёдаги биринчи автомобил йўлини аэропорт боғловчи сувости тугуни қурилди.

Натижада энди иккита йирик иқтисодий марказ орасидаги йўлни тўрт баробар тезроқ — атиги 30 дақиқада босиб ўтиш мумкин.

Икки шаҳарни боғловчи янги автомобил йўли улар жойлашган Гуандун провинциясининг ижтимоий-иқтисодий ривожланишига катта фойда келтириши айтилмоқда.

Мазкур йўлни қуриб, Хитой ўзининг инновацион ёндашуви билан жаҳонни яна бир бор лол қолдирди. Хитойлик қурувчилар жуда мураккаб лойиҳани амалга оширди ва кўприк ҳамда туннел қуриш бўйича дунёда энг илғор эканини исботлади.

Лойиҳани амалга оширишда хавфсизлик масалаларига жиддий эътибор қаратилган. Жумладан, туннел қурилишида ёнғин ўчириш ва тутунни йўқотишнинг инновацион тизимлари жорий этилган.

Янги йўл бу ерда яшовчи одамларнинг узоғини анча енгил қилишдан ташқари, ҳудуднинг иқтисодий ривожланиши учун муҳим ҳисса қўшиши айтилмоқда.

Синхуа агентлигининг хабар беришича, янги автомобил йўли қурилиши жараёнида хитойлик мутахассислар қуйидаги жаҳон рекордларини ўрнатган:

Денгиз узра ўтказилган пўлат қутисимон тўсинларга эга осма кўприкнинг энг катта оралиғи (1 666 м);
Энг баланд денгиз палубаси (91 м);
Денгиз кўприги учун энг баланд навигация оралиғи;
Денгиз осма кўпригининг энг катта анкери (344 000 м3);
Денгиз кўпригининг шамолга чидамлилик бўйича энг юқори синов тезлиги (83,7 м/с);
Қайноқ эпоксид асафалтбетонли қоришма ётқизилган пўлатдан ясалган энг катта кўприк юзаси (378 800 м²);
Қоқилган қувурлардан тайёрланган энг узун икки томонлама саккиз полосали туннел (5 035 м);
Пўлат бетони ва қобиқдан барпо этилган энг кенг сувости қувурсимон туннели ( 55,6 м);
Ерга қоқилган қувурнинг пўлат қобиғи ичига энг катта бир вақтда қуйилган ўзи зичланадиган бетон (29 000 м3);
Чўктирилган қувур билан туннелнинг охирги бирикиш жойида фойдаланилган кўп марта букланадиган энг катта М-симон гидроизоляция (3 м).

Маълумот учун, дунёдаги энг узун ўнта кўприкнинг еттитаси Хитойда қурилган.

Данян-Куншан кўприги. Асосий қисми денгиз устидан ўтган бу кўприк 2010 йилда қуриб битказилган бўлиб, у Шанхай ва Нанкин шаҳарларини ўзаро боғлайди. Кўприкнинг умумий узунлиги 165 км бўлиб, у дунёдаги энг узун кўприк сифатида Гиннеснинг рекордлар китобига киритилган.

Чжанхуа-Гаосюн кўприги. Бу кўприк ҳам денгиз устидан ўтган бўлиб, у Багуачжан ва Гаосюн шаҳарларини ўзаро боғлайди. Кўприкнинг узунлиги 157 км бўлиб, у 2007 йилда фойдаланишга топширилган. Кўприкдан поездлар ҳам ҳаракатланади ва улар бир ойда ўртача 200 млн йўловчи ташийди.

Тянцзин кўприги. Бу кўприк қуруқликда қурилган бўлиб, унда асосан поездлар ҳаракатланади. Кўприкнинг узунлиги 114 км бўлиб, у Ланфан ва Цинсян шаҳарларини ўзаро боғлайди.

Чандэй кўприги. Бу кўприк 2010 йилда фойдаланишга топширилган бўлиб, унда асосан тезюрар поездлар ҳаракатланади. Кўприкнинг узунлиги 106 км бўлиб, унда поездлар соатига 350-380 км тезликда ҳаракатланади.

Вэй дарёси устидаги кўприк. Бу кўприк ҳам 2010 йилда фойдаланишга топширилган. Унинг узунлиги 79,7 км бўлиб, кўприк Чжэнчжоу ва Сиан шаҳарларини ўзаро боғлайди. Кўприк Вей дарёсини икки марта кесиб ўтади.

Ҳонг Конг-Чжухай-Макао кўприги. Бу кўприк ҳам денгиз устида қурилган бўлиб, у 2018 йилда фойдаланишга топширилган. Узунлиги 55 км бўлган бу кўприкдаги 6 қаторли йўлда автомобиллар ҳаракатланади. Кўприк Ҳонг Конг-Чжухай-Макао шаҳарларини ўзаро боғлайди.

Пекин кўприги. “Пекиндаги баҳайбат кўприк” деб аталувчи бу кўприк 2010 йилда фойдаланишга топширилган. Унинг узунлиги 48 км бўлиб, у Пекин-Шанхай темирйўл линиясининг бир қисми ҳисобланади. Бу шаҳарлар орасида поезд ҳар беш минутда қатнайди ва худди метро поездларидай ишлайди.

Ғайрат Йўлдош тайёрлади.