Америка етакчисининг куёви Жаред Кушнер АҚШ президенти Доналд Трамп тинчликка эришиш учун ҳаракатлар тўпламини тайёрлашга топшириқ берганини айтди. У бу ҳақда Киевда Украина президенти Володимир Зеленский билан ўтказилган музокаралардан сўнг маълум қилди.
«Президент Трампнинг вазифаси ва бизнинг Стив билан шуғулланаётган ишимиз — тинчлик пакетини тайёрлаш», — деди у.
Кушнернинг қайд этишича, Трамп Россия ва Украина орасида «душманлик бўлмаслиги, уларнинг улкан салоҳиятга эга бўлиши ва бир-бири билан ёвлашиш ўрнига манфаат топишларига эришиш»ни истайди.
Учрашув чоғида давомли тинчлик унсурлари қандай бўлиши кераклиги ва Украина, Россия ҳамда бутун дунё учун бунинг қандай фойдаси борлиги муҳокама қилинди, деди у.
Кушнернинг қўшимча қилишича, уч томонлама музокараларга қайтиш самарали қадам бўлади.
«Биз Стив билан ярим йилча аввалгидек уч томонлама шаклга қайтиш жуда фойдали бўларди деб ҳисоблаймиз. Биз иккала томон билан ҳам музокара ўтказдик ва тез орада олға силжиш бўлади деб умид қиламиз», — деди у.
Axios нашрининг Киевдаги музокараларда қатнашган манбасининг сўзларига кўра, Кушнер ва Уиткофф томонлар билан «янгиланган» тинчлик таклифи устида ишлаш ниятида.
«Агар барча манфаатдор томонлар тегишли қадамни ташлашса, вазият яхши томонга ўзгариши мумкин», — деган у.
Уиткофф ва Кушнер 6 сентябр куни Киевга келишди. Бундан аввал эса улар Москвада президент Владимир Путин билан учрашув ўтказишди. Учрашув қарийб уч соат давом этди.
