Британияда 17 ёшли шахсга болалар ўлими бўйича айблов қўйилди

Британияда 17 ёшли йигит 29 июл куни Англия шимолидаги Саутпорт шаҳрида болалар рақс студиясига ҳужум қилганликда айбланмоқда. У учта қотиллик ва ўнта одам ўлдиришга суиқасдда айбланди, деди Англия ва Уэлсдаги жиноий ишларни назорат ва таъқиб қилиш бўйича бош давлат агентлиги – Қироллик прокуратура хизмати 31 июл, чоршанба куни. Ҳибсда сақланаётган айбланувчи пайшанба куни Ливерпулдаги судга келади.

Чоршанба куни Лондон марказида Саутпортдаги воқеаларга бағишланган британиялик ултрамиллатчиларнинг норозилиги пайтида 100 дан ортиқ одам қўлга олинди. Унинг иштирокчилари мамлакатга ноқонуний мигрантларнинг кириб келишини тўхтатишни талаб қилишди. Намойиш полиция билан муштлашувга айланиб кетди. Британия ОАВ хабар беришича, намойишчилар Даунинг-стритдаги бош вазир қароргоҳи ёнидаги панжара устидан шиша ва файерлар улоқтирган.

Бир кун аввал Саутпортда ўнг экстремистлар томонидан намойишлар зўравонликка айланиб кетган эди. Ўшанда 39 полициячи яраланган. Намойишчилар расмийларни жиноятчининг асл келиб чиқишини яширишда айблашди. Шу муносабат билан полиция айбланувчи Британияда туғилгани ва Саутпортга қўшни Бэнкс шаҳарчасида яшаганини таъкидлади.

Саутпортдаги болалар студиясига пичоқ билан ҳужум уюштирилди

29 июл куни Саутпорт курорт шаҳрида 17 ёшли йигит 6 ёшдан 11 ёшгача бўлган болалар учун мўлжалланган Hart Space Studious рақс студиясига пичоқ билан ҳужум қилди. Ҳужум оқибатида уч қиз ҳалок бўлган. Яна саккиз нафар бола пичоқланган, улардан беш нафарининг аҳволи оғир.

Болаларга ёрдам беришга шошилган икки ёши катта шахс ҳам оғир жароҳатлар билан шифохонада. Ҳозирча полиция ҳужумни террорчилик ҳужуми деб баҳоламаяпти.