Олимлар: 2024 йил яна рекорд даражада иссиқ бўлиши мумкин

2024 йил рекорд даражадаги энг иссиқ йил бўлиши мумкин, гарчи июл ойида ҳарорат рекордларининг 13 ойлик серияси якунланган бўлса ҳам. Бу ҳақда 7 август, чоршанба куни Еврокомиссия томонидан қўллаб-қувватланадиган ва ЕИ томонидан молиялаштирилган Copernicus (C3S) иқлим ўзгариши мониторинги хизмати томонидан маълум қилинди. Ўтган ой 1940 йилдан бери рекорд даражадаги иккинчи энг иссиқ ой бўлди, бу 2023 йил июлидан бироз салқинроқ, холос. Ўтган йилнинг июнидан 2024 йилнинг июнигача ҳар ой йил фасли учун янги ҳарорат рекорди ўрнатилди.

Июл ойида ўртача глобал ҳарорат Целсий бўйича 16,91 даражани ташкил этди, бу ўтган йилнинг шу ойига нисбатан атиги 0,04 даражага паст. Аммо «умумий контекст ўзгармади, бизнинг иқлимимиз исишда давом этмоқда», деди C3S раҳбари ўринбосари Саманта Бержесс. Унинг сўзларига кўра, иқлим ўзгариши ҳалокатли оқибатлари 2023 йилдан анча олдин бошланган ва глобал парник газлар ташламалари нол даражага етгунча давом этади.

Январдан июлгача глобал ҳарорат 1991-2020 йиллардаги ўртача кўрсаткичдан 0,7 даражага юқори бўлган. 2024 йил ўтган йилга қараганда иссиқроқ бўлишининг олдини олиш учун бу аномалия жорий йил қолган қисмида сезиларли даражада камайиши керак. Шундай қилиб, «2024 йил рекорд даражадаги энг иссиқ йил бўлиши эҳтимоли ортиб бормоқда», дея маълум қилди Copernicus хизмати.

Июлда рекорд даражадаги энг иссиқ икки кун бўлди

2024 йил июл ойи 1850-1900 йиллар оралиғида ўша ой учун ҳисобланган ўртача ҳароратдан 1,48 даража Целсий бўйича иссиқроқ бўлди. Ер тарихидаги энг иссиқ икки кунни бошидан кечирди ва 22 ва 23 июл кунлари глобал ўртача ҳарорат ҳақиқатда тенглашди ҳамда 17,6 даражага етди.

Инсон фаолияти туфайли юзага келадиган ортиқча иссиқликнинг 90 фоизини ўзига сингдирувчи океанлардаги ҳарорат июл ойида энг юқори рекорд даражага яқинлашди, яъни 20,88 даража Целсий бўйича, бу 2023 йил июлидан атиги 0,01 даража паст. Бироқ, Copernicus олимларининг таъкидлашича, глобал ҳарорат кескин ошишига ҳисса қўшган Эл-Нинё об-ҳаво режими унинг совиган варианти Ла-Ниняга ўтганига қарамай, «кўп минтақаларда океан ҳарорати ғайриоддий даражада иссиқ бўлиб қоляпти».