ЕИ Украинага 35 млрд евро тақдим этади

Европа Иттифоқи Украинага 35 миллиард еврогача пул бермоқчи, у Россиянинг музлатилган активларидан тушган маблағ ҳисобидан молиялаштирилади. «Энди биз Украинага Россиянинг музлатилган активларидан келадиган даромад ҳисобига қопланадиган ушбу маблағни жуда тез тақдим эта олишимизга ишончимиз комил», деди Еврокомиссия раҳбари Урсула фон дер Ляйен Киевда 20 сентябр, жума куни Украина президенти Володимир Зеленский билан қўшма матбуот анжуманида. 

Фон дер Ляйен айтишича, Россиянинг кунлик ҳужумлари Украина Европа Иттифоқининг доимий ёрдамига муҳтожлигини кўрсатмоқда. «Европа комиссияси G7 мажбуриятлари доирасида Украинага 35 миллиард еврогача пул ажратади», — деб ёзди фон дер Ляйен X ижтимоий тармоғида.

AFP хабар беришича, сиёсатчи кеча эрта тонгда Украина пойтахтига етиб келган. У кетишидан олдин фон дер Ляйен Европа Иттифоқи Украинага келгуси қишда фавқулодда гуманитар эҳтиёжларни қондириш учун яна 160 миллион евро ажратишини эълон қилди. Ушбу пулнинг 100 миллиони музлатилган Россия активларидан тушадиган маблағдан йўналтирилади. «Россия ўзи келтирган вайронагарчилик учун тўлаши адолатдан», — деди Еврокомиссия раҳбари.

ЕИ Украинага иситиш мавсумидан ўтишда ёрдам беради

Европа Иттифоқи ҳисоб-китобларига кўра, Украина энергетика инфратузилмасининг ярмига яқини вайрон бўлган, бу эса уйлар, шифохоналар ва мактабларни иситишни қийинлаштиради. Россия Украинанинг тахминан 9 гигаватт энергетика инфратузилмасини ишдан чиқарди, фон дер Ляйен. Бу, унга кўра, «уч Болтиқбўйи мамлакатининг энергия эквивалентини» ифодалайди. «Иссиқлик мавсуми икки ҳафтадан сўнг бошланади, Россиянинг Украина фуқаролик энергетика инфратузилмасига қилган шафқатсиз ҳужумлари максимал зарар етказишга қаратилган. Биз Украинани бу вазиятдан чиқишда қўллаб-қувватлаймиз», — деди Еврокомиссия раҳбари.