Ўзбекистондаги етакчи тижорат автомобиллар ишлаб чиқарувчиси – Самарқанд автомобил заводи (SamAuto) Тошкентда 23-25 октябр кунлари CАEх кўргазмалар мажмуасида бўлиб ўтган “Komtrans Tashkent 2024” халқаро кўргазмасида қатнашди. Компания кенг маҳсулот ассортиментини, жумладан энг янги ишланмаларни намойиш қилди. SamAuto стендидаги асосий тадбирлардан бири SAZ LF70 автобуси прототипининг тақдимоти бўлди.

Сиқилган табиий газдаги SAZ LF70 прототипи

SamAuto тақдим этган SAZ LF70 автобусининг прототипи – бу “SamAuto”нинг энг янги ўз ишланмаси. Тежамкор ва экологик тоза тўққиз метрли паст полли автобус сиқилган табиий газ (CNG)да ҳаракатланади. У ISUZU двигатели, Аллисон автоматик узатмалар қутиси, Италиянинг BRIST компанияси кўприклари ва Wabco тормоз тизими билан жиҳозланган бўлиб, бу ишончлиликни, юқори эксплуатация ресурси ва фойдаланишнинг хавфсизлигини таъминлайди. SAZ LF70 модели кам мобил йўловчилар учун қулай “kneeling” тизими билан жиҳозланган: бекатларда йўловчи чиқариш ва туширишда кузов эшик томонга эгилиб “ўтиради”.

Йўловчи сиғими оширилган шаҳар паст полли автобуси (70 киши, жумладан 26 та ўтириш жойи) БМТ YIK халқаро қоидалари талабларига мувофиқ, шаҳар йўналишлари учун махсус ишлаб чиқилган. Айнан шу сабабли, ташламалар даражаси ва эксплуатация сарфларининг камайиши уни йирик шаҳарлар автотранспорт корхоналари учун идеал танловга айлантиради.

SAZ LF70 автобусининг техник характеристикаси:

Габаритлар: 9410 х 2550 х 3452 мм. Қаторлама ўн олти цилиндрли экологик “Евро-5” тоифасига мансуб двигател, ишчи ҳажми – 7 790 куб см, автоматик олти босқичли узатмалар қутиси билан жиҳозланган. CNG -1/ CNG -3 тоифасидаги бешта баллонга қуйиладиган табиий газ ҳажми, 200 бар босимда, 725 литр ёки 145 куб/м, бу автобусга битта ёқилғи қуйишда 300 км юриш имконини беради.

Прототип юксак аниқликда тақдим этилган, бу маҳсулотнинг потенциал фойдаланувчиларига барча асосий функцияларнинг ишга лаёқатлилигини текшириш имконини беради. Кўргазма давомида SamAuto мутахассислари, бозор талаблари ва буюртмачилар истакларини инобатга олган ҳолда, SAZ LF70 CNG прототипининг модификациялари ва опциялар тўпламини муҳокама қилиш учун, мижозлар ва ҳамкорлар билан қатор учрашувлар ўтказишни режалаштирган. SAZ LF70 автобусининг прототипи билан бир вақтда, компанияда SAZ LF70 ЭВ электробусини ишлаб чиқиш давом этмоқда. Компания транспорт операторлари учун максимал самарали ечимлар яратиш мақсадида эксплуатация қилишнинг барча хусусиятларини ҳисобга олишга интилади.