Зимбабве полициясига хизмат вақтида мобил телефондан фойдаланиш тақиқланди

Зимбабве ҳукумати полиция ходимларига иш вақтида мобил телефонлардан фойдаланишни тақиқлади, деб хабар беради BBC.

Қайд этилишича, энди барча ходимлар иш жойига келган вақтида мобил телефонларини раҳбариятига топширишлари керак — ундан фақат танаффусда фойдаланишга рухсат берилади. Мазкур тақиққа нима сабаб бўлгани номаълум, аммо тахминларга кўра, бу полициячилар орасида коррупцияга қарши курашни кучайтиришга қаратилган саъй-ҳаракат бўлиши мумкин.

Янги тартиб бир неча кун олдин мамлакат пойтахти Ҳарареда полиция ходимлари жамоат транспортида пора олгани тасвирланган видео ижтимоий тармоқларда кенг тарқалганидан кейин жорий этилмоқда.

Полиция участкалари ходимларига янги тақиққа риоя этилишини назорат қилиш буюрилган, бунга бўйсунмаган ходимлар жавобгарликка тортилади.

«Агар хизмат мажбуриятларини бажараётган полициячининг ёнидан мобил телефон топилса, ушбу ходимга масъул бўлган шахсга жавобгарлик белгиланади», — дейилади хабарда.

Зимбабве полицияси маошларнинг камлиги ва иш шароитининг ёмонлиги туфайли мамлакатдаги энг коррупцияга ботган тизим ҳисобланади.