Зоминда ота ва ўғил қўшни эр-хотинни ўлдириб қўйди. Бунга 22 йиллик адоват сабаб бўлган

Зомин туманида қотилликка қўл урган ота ва ўғил жиноий жазога тортилди. Kun.uz суд ҳукми билан танишди.

Суд ҳукмида келтирилишича, Зомин туманининг Туркман маҳалласида яшовчи, 54 ёшли Ҳ.Ҳ ва унинг 2001 йилда туғилган, Тошкент давлат иқтисодиёт университетининг 3-босқич талабаси бўлган ўғли Э.Я. қотиллик жиноятига қўл урган: ота ва ўғил уларга қўшни бўлган эр-хотинни қасддан уриб ўлдирган.

Ҳ.Ҳ. ва унинг ён қўшниси С.М. ўртасида олдиндан низо бўлган. Бу келишмовчиликлар баъзида жанжалларга айланиб турган. 2024 йилнинг май ойидаги навбатдаги жанжал эса қотиллик билан тугади.

2024 йил 5 май куни ён қўшнининг ўғли Б.М. судланувчи Ҳ.Ҳ.нинг турмуш ўртоғи Г.Ҳ. билан жанжаллашиб қолган. Оқибатда Б.М. аёлнинг бош қисмига таёқ билан уриб, жароҳат етказган. Бундан жаҳли чиққан Ҳ.Ҳ. ва унинг ўғли Э.Я. жиноий режа тузган.

Режага кўра, ота ва ўғил 2024 йил 15 май куни соат 13-30 ларда қўшниси С.М. Lacetti машинасида турмуш ўртоғи билан биргаликда уйига қайтаётганда қўлларига темир бўлакларини кўтарган ҳолда йўлни тўсиб, таҳдид қилган ҳолда машинани тўхтатган. Сўнгра Ҳ.Ҳ. С.М.ни куч билан машинадан тортиб тушириб, қўлидаги темир бўлаги билан унинг бош, елка, кўкрак қафаси ва бошқа дуч келган жойига уриб, оғир тан жароҳатлари етказган.

Бу пайтда С.М.нинг турмуш ўртоғи машинанинг орқа ўриндиғидан тушиб, қоча бошлаган. Э.Я. унинг орқасидан қувиб бориб, ушлаб олган ҳамда машина ёнига судраб келган ҳолда қўлидаги темир билан бош қисмига бир неча маротаба урган.

Шундан сўнг ота ва ўғил Lacetti машинаси ичига қуриган ўт-ўланларни солиб, ёқиб юборган.

С.М. (17 май куни шифохонада) ва унинг турмуш ўртоғи олган оғир тан жароҳатлари оқибатида вафот этган.

Ҳ.Ҳ. судда айбига тўлиқ иқрор бўлиб, бу ишни ўзи қилганини, ўғлининг алоқаси йўқлигини билдирган.

“2002 йил С.М.нинг акаси У.М.дан уй сотиб олдим. Шундан бошлаб С.М. ва унинг ака-укалари мени кўчиб кетсин деб жанжал қила бошлашди.

Ўша куни С.М.нинг ўғли хотинимни ургани учун қасос олиш мақсадида темир кўтариб олдига чиққандим. Темир бўлаги билан С.М.ни 4 марта, турмуш ўртоғини 3 марта урдим.

Машинани ёқаётганимни ҳеч ким кўрмади. Ўғлим бу жанжалга аралашмади”, деган у ўз кўрсатмасида.

Судда Э.Я. айбига иқрорлик билдирмаган. Аммо унинг қилмиши гувоҳларнинг кўрсатмалари ва бошқа далиллар билан ўз исботини топган.

Суднинг ҳукми билан Ҳ.Ҳ ва ўғли Э.Я. Жиноят кодексининг 97-моддаси 2-қисми “а,ж,п” (жавобгарликни оғирлаштирадиган ҳолатларда қасддан одам ўлдириш) бандлари ва 173-моддаси (мулкни қасддан нобуд қилиш ёки унга зарар етказиш) 2-қисми “в” бандида назарда тутилган жиноятларни содир этганликда айбли деб топилган. Отага 20 йил, ўғилга 19 йил муддатга озодликдан маҳрум қилиш жазоси тайинланган. Ҳар иккисига жазонинг дастлабки 3 йилини турмага қамаш тарзида ўтаттириш белгиланган.