Вашингтонда йўловчи самолёт ҳарбий вертолёт билан тўқнашди. Асосий маълумотлар

American Airlines авиакомпанияси йўловчи самолёти ҳамда АҚШ армиясининг Black Hawk вертолёти ҳаводаги тўқнашувдан кейин Потомак дарёсига қулади. Тўқнашув 30 январга ўтар кечаси Вашингтондаги Роналд Рейган номидаги аэропорт яқинида рўй берган. Канзас штатининг Уичито шаҳридан CRJ700 рейсини амалга оширган самолёт маҳаллий вақт билан 21:47 да (Тошкент вақти билан 30 январ куни соат 7:47 да), аэропорт ҳудудига кираётганида армия вертолёти билан тўқнашган, деб хабар берган АҚШ фуқаролик авиацияси бошқармаси. Вашингтондаги Кеннеди марказига ўрнатилган видеокамера тўқнашувни тасвирга олган, кадрда Потомак устида портлаш рўй бергани кўринган. The Washington Post газетаси ёзишича, тўқнашув пайтида аэропорт ҳудудида ҳаво очиқ эди.

Самолёт бортида 64 киши бўлган: 60 йўловчи ва экипажнинг тўрт нафар аъзоси, деб хабар қилган American Airlines авиакомпаниясидагилар. АҚШ армияси эса вертолёт бортида уч нафар аскар бўлганини билдирган. Авиаҳалокатда базаси Виржиния штатида бўлган UH-60 Black Hawk русумли вертолёт иштирок этгани қўшимча қилинган. Associated Press хабарига кўра, армия вертолёти синов парвозини амалга ошираётганди. Ижтимоий тармоқда ҳалокатдан кейин олинган фотосуратлар пайдо бўлди, кадрларда самолёт қолдиқларини кўриш мумкин.

Полиция сувдан «кўплаб жасадлар»ни чиқариб олган, ҳозирча омон қолганлар топилмаган, деб хабар берган The Washington Post манбага асосланиб. CBS News манбасига кўра, дарёдан 18 кишининг жасади олиб чиқилган. Техасдан сайланган сенатор Тед Круз «қурбонлар борлиги»ни айтган, аммо уларнинг сонига аниқлик киритмаган. Қидирув-қутқарув амалиётида ўнлаб полициячилар, тез ёрдам ва фавқулодда хизматлар ходимлари иштирок этмоқда, улар қайиқларда Потомак бўйлаб ҳаракатланиб, самолёт ва вертолётнинг омон қолган йўловчиларини қидирмоқда. Потомак — эни юз метр, чуқурлиги бир неча метрга етувчи, тўлиб оқадиган дарё. Вашингтон аэропорти 31 январ тонгига қадар ёпилган.

CNN телеканали аэропортдаги диспетчерлар ва вертолёт экипажи сўзлашуви расшифровкасини эълон қилди. Телеканал LiveATC.net сайтидан олган аудиода диспетчер вертолёт экипажига шундай дейди: «PAT 2-5, сиз CRJ [самолёти]ни кўряпсизми?». Кейин диспетчер айтади: «PAT 2-5 CRJ ортидан юринг». Кейин эса аудиоёзувда чуқур хўрсиниш ва қаттиқ бақириш овози эшитилади, бу катта эҳтимол билан тўқнашув вақтидаги овозлар бўлган.

АҚШ президенти Доналд Трамп Рейган номидаги аэропортда рўй берган «даҳшатли авария ҳақида тўла хабардор қилингани»ни айтган. «Худо уларнинг руҳларини шод қилсин. Қутқарувчиларимизга қилаётган ишлари учун миннатдорчилик билдираман. Мен вазиятни кузатиб боряпман ва келган тафсилотларни бериб бораман», — деган Трамп.

Трамп авиаҳалокатнинг олдини олиш мумкин эди, деб ҳисобламоқда. АҚШ президенти ўзига тегишли бўлган Truth Social ижтимоий тармоғида самолёт аэропортга қўниш учун «идеал» ҳолатда яқинлашгани, вертолёт эса узоқ вақт давомида тўғри йўловчи лайнерга қараб учгани ҳақида ёзган. «Тунда ҳаво очиқ эди, самолётда чироқлар ёниб турганди, вертолёт нима учун юқорига кўтарилмаган, пастламаган, бурилмаган. Нима учун диспетчерлар минораси вертолётга самолётни кўряпсанми дейиш ўрнига унга нима қилишни айтмаган? Бу ёмон ҳолат, бунинг олдини олиш керак эди», — дейди Трамп.

Трамп Вашингтондаги авиаҳалокатда ҳеч ким омон қолмаганини маълум қилди. АҚШ президенти кун охирида Оқ уйдаги брифингда чиқиш қилиб, Вашингтонда American Airline самолёти ва Black Hawk вертолёти ҳалокатидан ҳеч ким омон қолмаганини маълум қилди. У бутун тун давомида кенг кўламли қидирув-қутқарув амалиёти ўтказилгани, унга барча мавжуд ресурслар жалб этилганини билдирган. «Бу мамлакатимиз пойтахтида ва халқимиз тарихида даҳшатли фожиа бўлган қоронғи ва оғриқли кеча эди. Бизни бевақт тарк этган ҳар бир киши учун қайғурамиз», — деган Трамп.

Авиаҳалокат 14 фигурачи ҳаётига зомин бўлди, улардан олти нафари Skating Club of Boston спорт клубига алоқадор бўлган, деб хабар берди клуб директори Даг Зегиба. Унинг сўзларига кўра, қурбонлар орасида — клуб мураббийлари, россиялик жаҳон чемпионлари Вадим Наумов ва Евгения Шишкова бўлган. Бортда Skating Club of Boston аъзолари бўлган яна икки фигурачи — 16 ёшли Спенсер Лейн ва Жинна Ҳан, шунингдек, уларнинг оналари бор эди. 

АҚШда йўловчи самолётлар билан боғлиқ сўнгги йирик ҳалокат 10 йил олдин рўй берганди. 2013 йил 6 январида Сан-Францискода Asiana Airlines авиакомпанияси самолёти фавқулодда қўнишни амалга оширган, уч киши ҳалок бўлиб, 187 киши яраланганди. Кўплаб қурбонларга сабаб бўлган сўнгги йирик авиаҳалокат эса 2009 йил 12 февралда рўй берган: ўшанда Colgan Air компанияси самолёти Ню Йоркда қулаб, унинг бортидаги 49 кишининг барчаси ва ердаги бир киши ҳалок бўлган.