Falcon 9 ташувчи ракетаси Starlink глобал интернет тизими учун яна 22 та кичик ўлчамли сунъий йўлдошни орбитага олиб чиқди. Бу ҳақда SpaceX компанияси хабар берди.
«22 та Starlink сунъий йўлдошлари олиб чиқилгани тасдиқланди», — дейилади хабарда.
Ракета Калифорниянинг Ванденберг Космик кучлари базасидаги SLC-4E старт майдончасидан учирилган. Орадан тахминан бир соат ўтгач, сунъий йўлдошлар ташувчи ракетанинг иккинчи поғонасидан ажралган.
Парвоз доирасида ташувчи ракетанинг 17 марта фойдаланилган поғонаси Тинч океанидаги Of Course I Still Love You дрон платформасига бошқарилувчан вертикал қўнишни амалга оширган.
SpaceX компанияси 2019 йилдан бери Starlink лойиҳаси доирасида 7,8 мингдан ортиқ шу каби сунъий йўлдошларни учирган. Уларнинг бир қисми бузилган ёки орбитадан чиқиб кетган. 6,9 мингдан зиёд аппарат ҳозирда орбитада соз ҳолатда.
Эслатиб ўтамиз, Falcon 9 ташувчи ракетаси 31 декабр куни Starlink интернет қопламаси тизимининг глобал тармоғи учун яна 21 та сунъий йўлдошни орбитага муваффақиятли олиб чиққани тўғрисида хабар берилганди. SpaceX компанияси 2024 йилда 134 та ракета учирган — бу янги жаҳон рекорди.
