Паркентдан Тошкентгача темирйўл қурилади

Тошкент вилоятининг Паркент тумани марказидан пойтахтгача қарийб 24 км узунликда темирйўл қурилмоқда. Бу ҳақда вилоят ҳокимлиги хабар берди.

«Паркент туманини пойтахт билан боғловчи «Байтқўрғон–Паркент» электрлаштирилган темирйўлининг қурилиши жадал олиб борилмоқда. Бу йўлнинг умумий узунлиги 23,8 километрдан иборат. Лойиҳа доирасида 2 та ажратиш пункти, 4 та кўприк, 2 та йўл ўтказгич, 1 та туннель туридаги йўл ўтказгич, 78 та сув ўтказиш иншооти, 7 та автомобиль йўли ва темирйўли кесишмаси қурилиши режалаштирилган», дейилади хабарда.

Шунингдек, қайд қилинишича, «Паркентсой» бўйида янги автойўл, кўпқаватли уй-жойлар, ижтимоий соҳа, савдо ва хизмат кўрсатиш объектларининг қурилиши бошланган. Туман марказидаги кўприк реконструкция қилиняпти, ёз ойларида транспорт оқими кўпаядиган асосий йўлни туннель орқали Заркент ва Сўқоқ йўлига улаш ишлари кетяпти.

Таъкидланишича, қурилиш майдонининг фуқаролар фойдаланувида бўлган қисмида, амалдаги қонунчиликка биноан, «ўзаро келишув ва холис, адолатли баҳолашдан» кейин ишлар бошланади. «Ҳеч кимнинг норози бўлишига йўл қўйилмайди».