Фарғонада Қизил китобга киритилган қушни ноқонуний сақлаб келган фуқаро ушланди

Фарғонада Қизил китобга киритилган қушни сотмоқчи бўлган фуқаро қўлга олинган. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги ахборот хизмати хабар бермоқда.

Маълум қилинишича, Экологик назорат инспекцияси томонидан ижтимоий тармоқлар орқали фуқаро И.И. Саҳро лочинини (шахин қуши) ноқонуний сақлаб келаётгани ва сотувга қўйгани аниқланган.

Ҳолат юзасидан Фарғона вилояти Экология бошқармаси, вилоят ИИБ ва вилоят прокуратураси томонидан ҳуқуқбузарликка чек қўйиш чора-тадбирлари олиб борилиб, ҳуқуқбузар қўлга олинган.

Қайд этилишича, мазкур иш жиноий тартибда ҳуқуқни муҳофаза қилиш органлари томонидан кўриб чиқилади.

Маълумот учун, Саҳро лочини лочинсимонлар оиласига мансуб қуш бўлиб, Ўзбекистон Қизил китобига киритилган. Уни табиатдан ноқонуний ажратиб олганлик учун Вазирлар Маҳкамасининг 2014 йил 20 октябрдаги 290-сонли қарори 14-иловасига мувофиқ БҲМнинг 1 500 баробари миқдорида (562 млн 500 минг сўм) зарар қўлланади.

Зарар миқдори БҲМнинг 300 баробаридан кўплиги сабабли Қизил китобга киритилган қушни ноқонуний сақлаган фуқарога тегишли иш жиноий тартибда ҳуқуқни муҳофаза қилиш органлари томонидан кўриб чиқилади.