Санкциялар енгиллашиши ёки кучайтирилиши Россиянинг қадамларига боғлиқ — АҚШ Молия вазирлиги

«Санкциялар режимининг келажаги Россия раҳбарияти қўлида. Айни ана шу уларнинг кейинги қадамлари чекловлар кучайтириладими ёки, аксинча, енгиллаштириладими — шунга аниқлик киритади», — деди Бессант. Шу билан бирга, вазирнинг таъкидлашича, АҚШ президенти Доналд Трамп «санкцияларни музокараларда устунликка эришиш учун ҳеч иккиланмасдан кучайтиришга тайёр».

Москва томонидан Қора денгиздаги ўт очишни тўхтатиш бўйича илгари сурилган шартлар Вашингтон учун қабул қилишга имконлими, деган саволга жавоб берар экан, АҚШ молия вазири бу талаблар ҳозирда кўриб чиқилаётганини таъкидлади. «Биз барча эҳтимолий вариантларни муҳокама қилмоқдамиз», — деди у.

Оқ уй 25 март куни Россия ва Украина билан эришилган келишув ҳақида маълум қилди. Унга кўра, томонлар Қора денгиз ҳавзасидаги ҳарбий ҳаракатларни тўхтатишга рози бўлишган. АҚШ маъмурияти маълум қилишича, келишувга кўра хавфсиз кемачиликни таъминлаш ва ҳудудда куч ишлатишдан воз кечиш назарда тутилган. Бунга жавобан Вашингтон Россиянинг қишлоқ хўжалиги маҳсулотларини жаҳон бозорига экспорт қилишини тиклашга кўмаклашишга тайёрлигини билдирган.

Одан вақт ўтгач, Кремл мазкур келишув бўйича ўз талқинини эълон қилди. Эълон қилинган баёнотда Россия томони ҳарбий ҳаракатларни тўхтатиш бир қатор шартлар бажарилган тақдирдагина мумкинлигини таъкидлади. Бу шартлар қаторида «Росселхозбанк» ва ташқи савдо операцияларини амалга ошираётган бошқа кредит ташкилотларидан санкцияларни бекор қилиш, ушбу банкларнинг SWIFT тизими ва валюта корреспондентлик ҳисобларига қайта уланишини таъминлаш каби талаблар бор.

Украина президенти Володимир Зеленский Кремлнинг баёнотига қаттиқ муносабат билдириб, уни «манипуляция ва алдаш» деб атади. «Биз Россия келишувларни қандай қилиб инкор этиб, фақат бизнинг воситачиларни эмас, бутун дунёни ҳам чалғитишга уринётганини кўряпмиз. Қора денгиздаги тинчлик шартлари Оқ уй баёнотида аниқ баён қилинган — улар билан ҳар ким танишиши мумкин. Аммо Москва яна реал воқеликни айлантиришга ҳаракат қилмоқда, ўт очишни тўхтатиш гўёки санкцияларни бекор қилишга боғлиқ, деб кўрсатмоқда», — деди Зеленский.

26 март куни Европа Иттифоқи Қора денгиз бўйича муҳокама қилинаётган келишув доирасида Россия томонидан илгари сурилган санкцияларни енгиллаштириш талабларини рад этди. Европа комиссияси вакили Анитта Ҳиппернинг таъкидлашича, Россия томонининг талабларига қарамасдан, Европа Иттифоқи «Росселхозбанк»га нисбатан жорий қилинган чекловларни бекор қилиш имкониятини кўриб чиқмаяпти.

«Санкциялар режимида ҳар қандай енгиллик фақат Россиянинг асоссиз ва ноҳақ тажовузини тўлиқ тўхтатиши ва барча ҳарбий кучларини Украина ҳудудидан тўлиқ чиқариши шарти билан амалга оширилиши мумкин», — деди Ҳиппер.