Украина «Москва» крейсери чўктирилишида АҚШнинг ролини рад этди 

2022 йил апрел ойида Қора денгизда «Москва» крейсерини йўқ қилиш бўйича операция Украина қуролли кучлари ҳарбий-денгиз кучлари томонидан режалаштирилган ва амалга оширилган. Бу ҳақда Украина ҳарбий-денгиз кучлари матбуот котиби Дмитрий Плетенчук 30 март, якшанба куни миллий телемарафон эфирида маълум қилди.У The New York Times газетасининг Украина гўёки АҚШдан Россия Қора денгиз флоти флагмани координаталарини олгани ва бундай зарбани мувофиқлаштиришни кутгани ҳақидаги маълумотни рад этди.

«Биз, албатта, тегишли рухсатни олган ҳолда, буйруқ занжирига мувофиқ, юқори раҳбарият билан зарба берилишини мувофиқлаштирдик. Ва бу, албатта, Украина раҳбарияти бўлди. Биз бу зарбани амалга оширдик, - деди Плетенчук. - Шунинг учун, мувофиқлаштириш ва «Москва» крейсери жойлашуви ҳақида аниқ маълумот берилгани тўғрисидаги гап-сўзлар ҳақиқатга мос келмайди, шунингдек, уни мувофиқлаштириш зарурлиги ҳақидаги маълумотлар тўғри эмас».

«Москва» крейсери Россиянинг Украинага қарши кенг кўламли уруши бошланганидан бир ярим ой ўтиб чўкиб кетди. Украина ҳарбийлари у иккита "Нептун" ракетаси билан урилганини маълум қилган бўлса, Россия Мудофаа вазирлиги ҳодисага кемани тортиш вақтида содир бўлган ёнғин натижасида бортдаги ўқ-дориларнинг портлаши сабаб бўлганини айтди. 2022 йил ноябр ойида Қора денгиз флоти Тергов қўмитаси крейсернинг чўкиши муносабати билан Россия Федерацияси Жиноят кодексининг 346-моддаси иккинчи қисми («ҳарбий мулкни қасддан йўқ қилиш ёки шикастлаш») бўйича жиноий иш қўзғатди. Иш 2023 йил охирида тўхтатилган.

Бортда қанча одам бўлгани ва улардан қанчаси ҳалок бўлгани ҳозирча номаълум. Россия матбуоти хабарига кўра, крейсерда 40 га яқин одам ҳалок бўлган, яна 100 нафари яраланган. Мустақил "Агентство" Россия нашрига кўра, "Москва" бортида ҳарбий хизматни ўтаётган 300 га яқин аскар бўлган. Шу билан бирга, бир ой олдин Россия президенти Владимир Путин чақирилувчилар ва захирадаги аскарлар Украинадаги «ҳарбий операцияда» қатнашмаслигига ваъда берган эди.