«Иссиқлик таъминоти» акциядорлик жамиятига раис тайинланди

Ҳукумат қарори билан Илҳом Тўраев «Иссиқлик таъминоти» акциядорлик жамияти бошқарув раиси этиб тайинланди. Бу ҳақда Қурилиш ва уй-жой коммунал хўжалиги вазирлиги матбуот хизмати хабар берди.

Тайинловга қадар Илҳом Тўраев Иссиқлик таъминоти тизимини ривожлантириш ва эксплуатация фаолиятини мувофиқлаштириш бошқармаси бошлиғи лавозимида фаолият юритган.

«Иссиқлик таъминоти» АЖ Шавкат Мирзиёевнинг 11 март куни имзолаган қарори билан вазирлик ҳузурида ташкил этилган бўлиб, унга қуйидаги вазифаларни юклаш белгиланган:

• таркибидаги ташкилотларнинг тариф сиёсатини юритиш;
• операцион самарадорликни ошириш, рақамлаштириш, кадрлар малакасини ошириш;
• давлат-хусусий шериклик лойиҳаларини мувофиқлаштириш ҳамда уларнинг бажарилишини назорат қилиш;
• лойиҳалар доирасида белгиланган самарадорликнинг энг муҳим кўрсаткичлари (KPI) ижросини мониторинг қилиш;
• «Иссиқлик таъминоти» АЖ ҳузурида масъулияти чекланган жамият шаклидаги буюртмачи хизматини ташкил этиш;
• инжиниринг компаниясининг низомини ишлаб чиқиш ҳамда тасдиқлаш.