Ёнғин Қуддус тоғлари яқинидаги Эштаол ўрмонида бошланган. Қутқарув хизматлари «Ёнғин зарбаси» режимида ишламоқда. Бу режим вазият назоратдан чиқиб кетиши эҳтимоли ошган вақтда кучга киради. Бу Исроил тарихидаги энг катта ўрмон ёнғинлари бўлаётгани айтилмоқда.
Оловни ўчириш учун 100 дан ортиқ ўт ўчирувчи бригада, шунингдек, самолёт ва вертолётлар жалб қилинган. Ўт ўчиришга ҳарбийлар ва полиция ҳам жалб қилинган. Исроил офатни мустақил бартараф этишда қийналгани учун Греция, Болгария, Хорватия, Италия ва Кипрдан ёрдам сўраган. Греция, Италия ва Хорватиядан ёрдам кучлари етиб келган. Фаластин миллий мухторияти ҳам ўз ёрдамини таклиф қилган. Ёнғин сабаб Исроил мустақиллик куни муносабати билан режалаштирилган тадбирлар бекор қилинган.
Кучли шамол ёнғин аввал ғарбга, кейин шарққа тарқалишига сабаб бўлган. Ҳаво иссиқлиги ўт ўчирувчилар ишини қийинлаштирган.
Исроил томони ёнғин атай уюштирилгани ҳақида версияни ёзмоқда. Исроил нашрларига кўра аввалроқ ҲАМАСга алоқадор Теlegram-каналларда Қуддус ва Ғарбий соҳилда ёнғин уюштиришга чақириқлар янграган. Ёнғин ташкиллаштиришда гумонланиб уч киши қўлга олинган.
1 майга келиб Исроилни соҳилбўйи ҳудудлар билан боғлайдиган шоссе очилгани хабар қилинмоқда. У ерда ёнғиндан қўрққан одамлар машинасини ташлаб қочгач, ҳаракат чекланганди.
Ёнғин 2 минг гектар майдонга тарқалгани айтилмоқда. Мамлакатдаги энг катта миллий боғлардан ҳисобланган «Канада парки» буткул ёниб кетган. Ҳозирча исроиллик ўт ўчирувчилар ёнғинни жиловлай олгани йўқ.
