Сенатор Грэм: Трамп Россияга қарши янги санкцияларни қўллаб-қувватлади

Доналд Трамп Украинадаги урушга қарамай, Россия билан савдо қилувчи мамлакатларга нисбатан 500 фоизлик божлар жорий этилиши тарафдори, дейди сенатор Линдси Грэм. Май ойида АҚШ президенти Москвага қарши санкциялар жорий этишдан бош тортган эди.

Фото: Видеодан кадр

АҚШ президенти Доналд Трамп Украинадаги урушга қарамай, Россия билан савдо қилувчи давлатларга нисбатан 500 фоизлик божлар тўғрисидаги қонун лойиҳасини қўллаб-қувватлади. Бу ҳақда 30 июн, якшанба куни қонун лойиҳаси ҳаммуаллифи, республикачи сенатор Линдси Грэм Американинг ABC телеканалига берган интервюсида айтиб ўтди.

«Кеча биринчи марта, биз голф ўйнаганимизда, президент менга бу қонун лойиҳасини олдинга силжитиш вақти келганини айтди», деди Грэм. Унинг сўзларига кўра, ҳужжатни кўриб чиқиш «июлдаги танаффусдан сўнг», яъни АҚШ Мустақиллик кунини нишонлашдан кейин бошланади. Конгресс ишини 7 июлда давом эттириши режалаштирилган.

"Агар сиз Россиядан товарлар сотиб олиб, Украинага ёрдам бермасангиз, АҚШга кетадиган товарларингизга 500 фоизлик божлар қўйилади. Ҳиндистон ва Хитой Путин нефтининг 70 фоизини сотиб олиб, унинг жанговар машинасини қўллаб-қувватлайди. Менинг қонун лойиҳамни 84 сенатор қўллаб-қувватлади. Бу президентга Ҳиндистон, Хитой ва бошқа мамлакатларга қарши санкциялар қўллаш имконини беради", — деди Грэм.

Унинг фикрича, қонун лойиҳасининг қабул қилиниши Трампга «ҳозир унда йўқ восита» беради. Сенатор президент қонун лойиҳасини имзолайдими ёки йўқми деган тўғридан тўғри саволга жавоб беришдан қочди ва «у яхши ҳолатда», деб жавоб берди.