АҚШ савдо битимини тузмаган давлатларга огоҳлантирувчи хат юборишни бошлади

Оқ уй 4 июлдан бошлаб, савдо ҳамкорларини Америкага экспорт бўйича янги тариф ставкалари тўғрисида хабардор қилишни бошлайди. Бу ҳақда президент Доналд Трамп маълум қилди, деб ёзди Financial Times. Қайд қилинишича, савдо битимини тузиш учун берилган муҳлат 9 июл куни ниҳоясига етади.

Америка президенти журналистларга жума куни 10 та ёки 12 та, кейинги кунларда эса кўпроқ мактуб юборилишини айтган. 9 июлгача Қўшма Штатларнинг барча ҳамкорлари ушбу кампания билан «тўлиқ қамраб олинади».

Трамп сўзларига кўра, янги тарифлар «ҳажми жиҳатидан турлича бўлади, балки 60-70% ёки 10-20% гача». Айрим давлатларга эса бундан ҳам юқори ставкалар жорий қилиниши мумкин.

Аввалроқ, АҚШ президенти яқин орада йирик савдо битимлари тузилиши ҳақида гапирган эди. Аммо 3 июл куни у сабр-тоқати тугаётганини айтди. «Менинг ниятим хат юбориш ва уларга қандай тарифларга дуч келишини айтиш. Бу анча осон», деди у.

Трамп янги тарифлар барча товарлардан олинадими ёки фақат айрим товарлар учун жорий қилинадими, бунга аниқлик киритмади. Масалан, автомобиллар ва пўлат учун мос равишда 25% ва 50% тарифлари аллақачон мавжуд. Янги тарифлар 1 августдан кучга киради.

Жорий ҳафта эълон қилинган маълумотларга кўра, май ойида АҚШ тарифларидан тушган даромад ўтган йилга нисбатан қарийб тўрт бараварга ўсиб, рекорд даражадаги 24,2 миллиард долларни ташкил этган, бу ўтган ойга нисбатан 25 фоиздан кўпроқ.

Трамп 2 апрел куни АҚШ савдо ҳамкорларига «жавоб тарифларини» жорий қилди. Бир неча кундан кейин, қимматли қоғозлар бозорлари кескин пасайиб бораётган бир пайтда у тарифлар учун 90 кунлик танаффус эълон қилди.

Шундан бери фақат икки давлат – Буюк Британия ва Ветнам АҚШ билан савдо битимини тузди.