АҚШ президенти Доналд Трамп душанба куни ҳеч қандай тафсилотларни келтирмасдан Қўшма Штатлар Украинага қуролларнинг янги партияларини юбориши ҳақида гапирди. Пентагон эса дарҳол қуролларни жўнатиш аллақачон бошлангани ҳақида эълон қилди.
«У тўхтамаётганидан ҳафсалам пир бўлди. Биз уларга яна кўпроқ қурол юбормоқчимиз. Биз буни қилишимиз керак. Улар ўзларини ҳимоя қила олиши керак. Уларга ҳозир жуда қаттиқ зарба беришяпти. Биз яна қурол-яроғ юборишимизга тўғри келади, ҳа, асосан мудофаа характеридаги қурол-яроғлар. Лекин уларга жуда, жуда қаттиқ зарба беришади. Бу тўс-тўполонда шунча одам ҳалок бўлмоқда», – деди Доналд Трамп Оқ уйда журналистларга. Нашрлар хабар беришича, у Путиннинг хатти-ҳаракатларидан норози эканини такрорлаган.
Трамп янги ёрдам ҳақида батафсил гапирмади: бу Исроил бош вазири Бинямин Нетаняҳу билан кечки овқат олдидан турли мавзулардаги қисқа савол-жавоблар эди.
«Президент Трампнинг кўрсатмаси билан мудофаа вазирлиги Украинага қўшимча мудофаа қуролларини юборади, шунда украиналиклар биз барқарор тинчликка эришиш учун ишлаётганимизда ўзларини ҳимоя қилишлари мумкин бўлади», – дейилади Пентагон матбуот котиби Шон Парнеллнинг Трамп баёнотидан кўп ўтмай вазирлик сайтида пайдо бўлган баёнотида.
Бу қандай қурол эканига Парнелл аниқлик киритмади.
АҚШ ҳарбий идораси матбуот котиби бир вақтнинг ўзида бутун дунё бўйлаб АҚШ ҳарбий ёрдамини текшириш давом этаётганини таъкидлади. Америка расмийлари Украинага ҳарбий ёрдам тўхтатилишини шундай текширув билан изоҳлаганди.
Ўтган ҳафта аввалига ОАВда, кейин расмий манбаларда Пентагон Украинага қурол-яроғ юборишни тўхтатгани маълум бўлганди.
2 июл куни ғарбдаги нишрлар Қўшма Штатлар Украинага ўқ-дорилар, жумладан Patriot тизими учун тутувчи ракеталар, Stinger кўчма зенит-ракета тизимлари, NASAMS ҳаво ҳужумидан мудофаа тизими ва F-16 қирувчи самолётлари учун ракеталар етказиб беришни қисман тўхтатгани ҳақида хабар берди. Мутахассислар бу Украина қуролли кучларининг Россиянинг кучайиб бораётган ҳаво ҳужумларини қайтариш қобилиятига ўта зарарли таъсир кўрсатиши мумкинлигини таъкидлаганди.
7 июл куни Оқ уй матбуот котиби Керолайн Лэвитт Украинага етказиб беришдаги тўхталиш Қўшма Штатлар бутун дунё бўйлаб ҳарбий таъминот стратегиясини қайта кўриб чиқаётгани билан боғлиқлигини айтди.
«Бу Пентагон томонидан нафақат Украинага, балки дунёнинг барча мамлакатлари ва минтақаларига кўрсатилаётган барча қуроллар, барча ёрдам бўйича стандарт текширувдир», – деди Лэвитт брифингда ва текширув АҚШ мудофаа вазири Пит Ҳегсетнинг топшириғи билан амалга оширилаётганини тасдиқлади.
