18 июл, жума куни Россия Адлия вазирлиги «чет эл агентлари» рўйхатини кенгайтирди. Рўйхатга қуйидагилар киритилди: журналистлар Ксения Кириллова ва Маша Майерс, шоира Наталя Резник, собиқ депутатлар Ксения Торстрем ва Дмитрий Великий, блогер Дмитрий Храмцов ва Шанинка (Москва олий ижтимоий-иқтисодий фанлар мактаби) сиёсатшунослик факултетининг собиқ декани Василий Жарков.
Бундан ташқари, Адлия вазирлигининг рўйхатига Россия бўйлаб митинглар, норозилик намойишлари ва фуқаролик акцияларини ёритиб борувчи Activatica онлайн портали ҳам киритилган.
24 июн куни Россия президенти Владимир Путин «чет эл агентлари» учун ҳам Россия Федерациясида, ҳам хорижда маъмурий жавобгарликни кучайтирувчи қонунни имзолади. Эндиликда жисмоний шахслар бўлган «чет эл агентлари»га «қонуний талабларга риоя қилмаслик» учун жарималар 30 дан 50 минг рублгача, мансабдор шахслар учун — 100 дан 300 минг рублгача, юридик шахслар учун — 300 дан 500 минг рублгача оширилди.
Апрел ойида Россия Давлат думаси Россия иштирок этмаётган халқаро ташкилотлар ёки хорижий давлат идоралари қарорларини амалга оширишга кўмаклашувчи шахсларни, агар уларнинг ҳаракатлари мамлакат хавфсизлигига таҳдид деб ҳисобланса, уларни «чет эл агенти» деб эълон қилишга рухсат берувчи қонунни қабул қилди. Бундан ташқари, Россиянинг ҳарбий-техник соҳаси ҳақида маълумот тўплайдиган ва тарқатадиган шахслар Россия Федерациясида «чет эл агентлари» деб тан олиниши мумкин.
