NYT: Трампнинг боингини таъмирлашга ядровий кучлар дастуридан тўланган

Қатар совға қилган самолётни таъмирлаш харажатларини яшириш учун Трамп уни мамлакат ядро арсеналини модернизация қилиш харажатларига киритди, деб ёзади NYT.

Доналд Трамп ва Тамим бин Ҳамад Ол Соний Фото: Alex Brandon/AP

АҚШ президенти Доналд Трамп Қатар томонидан унга Air Force One президентлик борти сифатида ҳадя қилинган Boeing 747-8 самолётини таъмирлаш қиймати ҳақидаги маълумотни яширди. 27 июл, якшанба куни The New York Times газетаси номаълум манбалар ва АҚШ Конгресси Бюджет бошқармаси хулосаларига таяниб ёзишича, Трамп ўз шахсий самолётини таъмирлаш харажатларини Пентагоннинг АҚШ ядровий арсеналини янгилаш харажатларига қўшди.

Газетанинг ёзишича, Трамп самолётни Қатар қироллик оиласидан совға сифатида қабул қилганидан бироз вақт ўтгач, Пентагон махфий Sentinel лойиҳаси доирасида АҚШ бюджетидан 934 миллион доллар сўраган. Расмий равишда, лойиҳа харажатлари АҚШнинг қуруқликдаги эскирган ядровий ракеталарини модернизация қилиш билан боғлиқ. Оммавий ахборот воситалари ушбу харажатни мамлакат бюджетидаги энг махфийлаштирилганлардан бири деб атади.

АҚШ Конгрессининг Бюджет бюроси Пентагонга ўтказилган 934 миллион доллар «деярли шубҳасиз» мамлакат ядро арсеналини модернизация қилиш учун эмас, балки Трампнинг президентлик самолётини қайта жиҳозлаш учун ишлатилади деб ҳисоблайди, дея ёзган NYT. Ушбу траншдан тушган маблағнинг бир қисми Қатарнинг Boeing 747-8 самолётини таъмирлашга сарфлангани ҳақидаги маълумот АҚШ ҳарбий-ҳаво кучларининг номи ошкор этилмаган вакилларининг журналистлар билан суҳбатида тасдиқланди.

Мутахассисларнинг фикрича, АҚШ президенти ўзига берилган самолётдан яқин орада фойдалана олмайди. Сиёсатчи эҳтиёжларини қондириш учун самолётни қайта жиҳозлаш ва модернизация қилиш икки йилгача давом этади. Шу билан бирга, АҚШда ишлаб чиқарилган янги Boeing 747-8'нинг нархи тахминан 400 миллион долларни ташкил қилади.