Стокҳолмда АҚШ-Хитой савдо музокаралари бошланди

АҚШ ва Хитой Стокҳолмда савдо музокараларининг янги босқичини бошлади. Бу ҳақда 28 июл, душанба куни Швеция бош вазири Улф Кристерссон идораси хабар берди.

АҚШ молия вазири Скотт Бессент ва Хитой бош вазири ўринбосари Хэ Лифэн бошчилигидаги учрашув АҚШ ва Европа Иттифоқи ўртасида савдо келишуви эълон қилинганидан бир кун ўтиб бошланди, деб хабар беради AFP.

Стокҳолмда Швеция ҳукумати қароргоҳи олдида икки давлат байроқлари кўтарилди. Музокаралар икки кун давом этиши кутилмоқда.

Шу билан бирга, АҚШ президенти Доналд Трамп 28 июл куни Шотландия ғарбидаги Тернберри шаҳридаги голф курортида Хитой ўз бозорларини дунёнинг қолган қисмига очишини исташини айтди.

«Хитой билан муносабатларимиз яхши, аммо Хитой - қаттиқ. Биз ҳаммамиз қаттиқмиз, ҳа, лекин нима бўлишини кўрамиз... Мен Хитой ўз мамлакатини очишини истардим», — дея Оқ уй раҳбарининг сўзларини келтиради Reuters.