Ўзбекистон ва Тожикистон ўртасидаги 2 та ўтказиш пункти халқаро мақомга эга бўлди

Ўзбекистон ва Тожикистон чегарасида 10 августдан иккита янги ўтказиш пункти очилди – Тошкент вилоятида «Бекобод Авто» ва Сирдарё вилоятида «Ховособод». Бу ҳақда Ўзбекистон Божхона қўмитаси хабар берди.

Пунктлар учинчи давлат фуқаролари ва транспорт воситаларини ўтказиш хизматини кўрсата бошлади. Қайд этилишича, назорат-ўтказиш пунктлари орқали ўтиш доимий равишда амалга оширилади.

«2025 йил 10 август куни соат 6:00 дан бошлаб ўтказиш пунктлари орқали учинчи давлат фуқаролари ва транспорт воситаларининг ўтишига рухсат берилди», дейилади хабарда.

«Давлат чегараси орқали ўтказиш пунктлари тўғрисида»ги ҳукуматлараро битимга кўра, Ўзбекистон ва Тожикистон чегарасида жами 17 та ўтказиш пункти фаолият кўрсатмоқда. Уларнинг аксарияти халқаро мақомга эга бўлиб, кеча-ю кундуз ишлайди.