Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Россия бўйлаб дронлар ҳужуми
14 август тонгида Ростов-Дон шаҳри марказидаги кўп қаватли уйга учувчисиз учар қурилма келиб урилган. Ростов области губернатори вазифасини бажарувчи Юрий Слюсарнинг сўзларига кўра, ҳужум натижасида 13 киши жароҳатланган, шундан икки нафари болалар. Яраланганларнинг олти нафари шифохонага ётқизилган, камида икки нафари оғир аҳволда.
Телман ва Лермонтов кўчалари ҳудудидаги 10 та уйга зарар етган – уларнинг ойналари синган ва балконлари шикастланган. Теlegram-каналларда камида битта уйнинг томи қисман шикастлангани акс этган фотосуратлар эълон қилинди. Уйлардан 212 киши эвакуация қилинди.
Украина қуролли кучлари Ростовдаги Жанубий ҳарбий округ штабини нишонга олган, аммо дрон шаҳар маркази устида йўналишини кескин ўзгартирган, бунга катта эҳтимол билан радиоэлектрон кураш воситалари ишга тушгани сабаб бўлган.
Белгород шаҳри эса қаторасига иккинчи кун зарбалар остида қолди. Губернатор Вячеслав Гладковнинг хабар беришича, кун давомида тўрт марта дронлар област маъмурияти биносига учиб келган.
Шу куни шаҳар устида кўплаб дронлар учиб юрган, ҳарбийлар шаҳар марказига олиб борувчи йўлларни тўсиб қўйган. Тармоқларда йўлда ҳаракатланаётган автомобилга дрон урилгани, шунингдек, савдо марказларидан бирига кетма-кет дронлар ҳужум уюштиргани акс этган кадрлар тарқалган.
Шунингдек, Волгоград нефтни қайта ишлаш заводига дронлар орқали зарба берилган ва ҳудудда ёнғин чиққан.
Аляска саммити арафаси
Бу вақтда Россия–Украина урушини тинч йўл билан ҳал қилиш йўлида навбатдаги босқич – Аляскада ўтадиган АҚШ–Россия саммитига тайёргарлик кўрилмоқда. Айни вақтда музокаралар ўтадиган Анкориж шаҳрига Россиядан илк самолёт келиб қўнган. Москвадаги Внуково аэропортидан учган Ил-96 самолёти бортида катта эҳтимол билан Путин ва Трамп учрашувига тайёргарлик кўриш билан шуғулланувчи «гуруҳлардан бирининг вакиллари» бўлган.
Учрашув Анкориждаги Элмендорф-Ричардсон ҳарбий базасида маҳаллий вақт билан 15 август куни соат 11:30 да, Тошкент вақти билан 16 августга ўтар кечаси бошланади.
